एजेन्सी – कप्तान एबी डिभिलियर्सको शतकमा दक्षिण अफ्रिका च्याम्पियन्सले वर्ल्ड च्याम्पियनसिप अफ लिजेन्डको उपाधि जितेको छ ।

इङ्ग्ल्याण्डको बर्मिङ्घममा शनिवार भएको फाइनलमा पाकिस्तान च्याम्पियन्सलाई ९ विकेटले पराजित गर्दै दक्षिण अफ्रिकाले उपाधि जितेको हो ।

१ सय ९६ रनको लक्ष्य दक्षिण अफ्रिकाले निर्धारित २० ओभरमा १९ बल बाँकी रहँदै १ विकेट गुमाएर पूरा गर्यो ।

ओपनर डिभिलियर्सले ६० बलमा १२ चौका र ७ छक्कासहित अविजित १ सय २० रनको शतकीय इनिङ खेले ।

प्रतियोगितामा डिभिलियर्सको छैटौं खेलमा यो तेस्रो शतक हो । उनले पहिलो विकेटका लागि अर्का ओपनर हसिम अम्लासँग ३६ बलमा ७२ को साझेदारी गरे ।

अम्ला १४ बलमा २ चौकासहित १८ रन बनाए । डिभिलियर्स र जेपी डुमीलीले दोस्रो विकेटका लागि १ सय २५ रनको साझेदारी गरे ।

डुमिनी २८ बलमा ४ चौका र २ छक्काका साथ ५० रनको अर्धशतक बनाउँदै अविजित रहे । पाकिस्तान च्याम्पियन्सका सइद अजमलले सान्त्वना १ विकेट लिए । पाकिस्तानले ७ बल प्रयोग गरेको थियो ।

त्यसअघि टस जितेर ब्याटिङ रोजेको पाकिस्तान च्याम्पियन्सले निर्धारित २० ओभरमा ५ विकेट गुमाएर १ सय ९५ रन बनाएको थियो।

ओपनर शर्जिल खानले ४४ बलमा ९ चौका र ४ छक्कासहित ७६ रनको अर्धशतकीय इनिङ खेल्दै आउट भए ।

उमर अमिन १९ बलमा ३ चौका र ३ छक्काको सहयोगमा ३६ रनमा अविजित रहे । आसिफ अली १५ बलमा २८, शोयब मल्लिक २० तथा कप्तान मोहम्मद हाफिज १७ रनमा आउट भए ।

दक्षिण अफ्रिका च्याम्पियन्सका लागि हिर्डुस भिल्जोन र वाइन पार्नेलले समान २ तथा डुनी ओलीभरले १ विकेट आफ्नो नाममा गरे ।

इण्डियन्स च्याम्पियन्सले सेमिफाइनल नखेले पछि पाकिस्तान च्याम्पियन्स लिग चरणको अंकको आधारमा फाइनल पुगेको थियो । दक्षिण अफ्रिका च्याम्पियन्सले सेमिफाइनलमा अस्ट्रेलिया च्याम्पियन्सलाई हराएको थियो ।