एजेन्सी – पाकिस्तानलाई ५ विकेटले हराउँदै भारतले दुबईमा आइतवार राति एसिया कप क्रिकेटको उपाधि जित्यो।

तर जितेपछि हुने ट्रफी वितरण समारोहमा भारतीय टोलीले ट्रफी लिन अस्वीकार गर्‍यो। एसियन क्रिकेट काउन्सिल (एसिसी) का अध्यक्ष मोहसिन नक्वीबाट ट्रफी ग्रहण गर्ने कार्यक्रम तय भए पनि भारतीय टोलीले त्यसलाई अस्वीकार गरेको हो।

नक्वी पाकिस्तान क्रिकेट बोर्डका अध्यक्ष र पाकिस्तानका गृहमन्त्रीसमेत भएकाले भारतले राजनीतिक कारण देखाउँदै यस्तो निर्णय लिएको बताइएको छ।

खेल राति १०:३० बजे सकिए पनि ट्रफी वितरण समारोह करिब एक घण्टा ढिलो भयो। समारोह सुरु भएपछि भारतीय खेलाडीले व्यक्तिगत पुरस्कार अरु पदाधिकारीबाट मात्र ग्रहण गरे ।

तर खेलाडीले नक्वीलाई अभिवादन गरेनन्। पाकिस्तानका कप्तान सलमान आघाले भने उपविजेताको चेक नक्वीबाट लिए।

समारोहपछि भारतीय कप्तान सूर्यकुमार यादवले पत्रकार सम्मेलनमा भने, ‘च्याम्पियन टोलीलाई यसरी ट्रफी नदिएको घटना मैले पहिलो पटक देखेको हुँ। हामीले मेहनत गरेर जितेका हौं, त्यसैले यसको हकदार पनि हामी नै हौं।’

समारोहमा वास्तविक ट्रफी प्रस्तुत नगरिएपछि भारतीय खेलाडीले पोडियममा उभिएर काल्पनिक ट्रफी उचाल्दै जितको खुसी मनाए।

भारतले यसअघि नै नक्वीबाट ट्रफी नलिने अडान लिएको थियो। प्रतियोगिता भर पाकिस्तानसँग खेल्दा उनीहरूले हात मिलाउन अस्वीकार गरेका थिए।

सुपर फोर चरणमा दुवै टोलीबीच वाकयुद्ध पनि भएको थियो। यस क्रममा सूर्यकुमार र पाकिस्तानका हारिस रउफलाई जरिवाना गरिएको थियो।