काठमाडौं (हाम्रो खेलकुद)- इन्दु बर्मा र पूर्व कप्तान रुविना क्षेत्रीले पाँचौं विकेटका लागि ६१ रनको साझेदारी गरेपछि मंगलवार  चौथो खेलमा नेपालले टि ट्वान्टी सिरिजमा मलेसियालाई ६ विकेटले पराजित गरेको छ।

योसँगै ५ खेलको सिरिज २–२ को बराबरीमा पुगेको छ। पाँचौं तथा निर्णायक खेल बुधवार हुनेछ। जितको लागि १ सय १२ रनको लक्ष्य नेपालले १७.३ ओभर  ४ विकेट गुमाउँदै पूरा गर्यो।

नेपालले सुरुवात राम्रो गर्न सकेन । ओपनर रुवी पोद्दार ५ रनमा, सम्झना खड्का ११ रनमा र पूजा महतो मात्र ७ रनमा आउट भए। यतिखेर नेपालले ३५ रन बनाएको थियो। कविता कुँवर पनि १६ रनमा आउट भइन्।

त्यसपछि कप्तान इन्दु र अनुभवी खेलाडी रुविनाले महत्वपूर्ण साझेदारी गदै नेपाललाई जिततर्फ डोर्याए। ३९ बल खेल्दै इन्दुले ५ चौका सहित अविजित ४८ रनको पारी खेलिन्।

रुविनाले २३ बल खेल्दै २ चौका र १ छक्का सहित अविजित २३ रन बनाइन्। आजको यो खेलमा एक छक्का मात्र संभव भयो। जुन रुविनाले प्रहार गरिन्।
बलिङमा आइना हमिजा, नुर दानिया र माहिरा इजातिले १/१ विकेट लिए।

त्यसअघि मलेसियाको वायुमास ओभल स्टेडियममा मलेसियाले टस जितेर पहिले ब्याटिङ गर्ने निर्णय गर्यो। उसले २० ओभरमा ५ विकेट गुमाउँदै १ सय ११ रन बनायो।

मलेसिया विरुद्ध नेपालले सानदार सुरुवात गर्यो। दुई ओपनर आइना हमिजाह हसिम र वान जुलिया रनको खाता नखोली आउट भए।

आइना कविता कुँवरको बलमा कट एण्ड बोल्ड हुँदा वानलाई पूजाले बोल्ड आउट गरिन्। लगतै कप्तान विनिफ्रेड डुरासिंगम २ रनमा नै इन्दुको बलमा आउट भइन्। पहिलो क्रमका ३ ब्याटर आउट हुँदा मलेसियाले २० रन बनाएको थियो।

त्यसपछि मास इलिस्या र माहिरा इजातिले चौथो विकेटका लागि ४८ रनको साझेदारी गर्दै इनिङ्स सम्हाले। माहिरा १८ रनमा पबिलियन फर्किन्।

नुर दानियाले १५ रन जोडिन्। मास क्रिजमा जम्दै अर्धशतक बनाउन सफल भइन्। ६३ बल खेल्दै ५ चौका सहित अविजित ५६ रनमा क्रिजमा रहिन्।

बलिङमा कविताले ४ ओभरमा १० रन दिएर ३ विकेट लिंदै किफायती प्रदर्शन गरिन्। पूजा र कविता जोशीले समान १ विकेट लिए।

यसअघि मलेसियाले पहिलो खेल ३ विकेट र तेस्रो खेल १३ रनको जितको थियो । दोस्रो खेलमा नेपाल ६ विकेटले विजयी भएको थियो। अब बुधबार हुने खेलले सिरिजको विजेता टुंगो लगाउने भएको छ।