मस्कट (हाम्रो खेलकुद) – आइसिसी टि ट्वान्टी विश्वकप एसिया तथा इएपी छनोट क्रिकेट प्रतियोगिता ओमानमा बुधवार सुरु हुँदैछ ।

प्रतियोगिता शीर्ष ३ टोली सन् २०२६ फेब्रुअरी मार्चमा भारत र श्रीलंकामा हुने टि ट्वान्टी विश्वकपमा पुग्नेछन् । नेपाल च्याम्पियन बन्दै विश्वकपमा पुग्न चाहन्छ । कागजी रुपमा प्रतियोगिता नेपाल सर्वाधिक मजबुत टोली हो ।

समूह ‘बी’ मा रहेको नेपालले बुधवार कुवेतसँग खेल्दै प्रतियोगिता सुरुआत गर्नेछ । खेल नेपाली समय अनुसार बुधबार साँझ ८ : ४५ बजे अलअमरेत क्रिकेट ग्राउण्ड १ मा सुरु हुनेछ ।

गत अप्रिलमा ४ देशसम्मिलित टि ट्वान्टी आई सिरिजको फाइनलमा नेपाल कुवेतसँग ३ रनले स्तब्ध भएको थियो । टि ट्वान्टी क्रिकेटमा कुनै भर नहुने हुँदा पहिलो खेलदेखिनै नेपाल आफ्नो उत्कृष्ट प्लेइङ ११ मैदान उतार्ने देखिन्छ ।

एक साताअघि युएईमा वेष्टइण्डिजसँगको ३ खेलको सिरिज, वार्मअप खेलमा ओमान र कतारविरुद्धको खेलपछि नेपाललाई आफ्नो प्लेइङ-११ निर्धारण गर्न केही सहज बनएको छ ।

टोलीमा पर्न खेलाडीबीच उच्च प्रतिस्पर्धा हुँदा नेपाललाई प्लेइङ ११ निर्धारण गर्न सहज भने हुने छैन । त्यसैले नेपालले आफ्नो प्लेइङ ११ मा सन्तुलन र पिच कन्डिसनलाई बढी ध्यानमा दिनेछ ।

नेपालले ओपनरमा कुशल भुर्तेल र आसिफ शेखलाई निरन्तरता दिने पक्का छ । कुशलले वार्मअप खेलमा कतारविरुद्ध अर्धशतक हानेका थिए ।

वेष्ट इण्डिजविरुद्धको अन्तिम खेलमा पनि राम्रो सुरुवात दिलाएका थिए । आक्रामक ब्याटर कुशल भुर्तेल आफ्नो लय समाउन संघर्ष गरेका छन् । तर उनी चलेको खण्डमा नेपालको जित सहज बन्न जान्छ ।

उनी ब्याटिङमा नचले बलिङ र फिल्डिङ मार्फत टोलीलाई योगदान दिने हुँदा टिममा निरन्तरता पाउनेछन् । उता आसिफ शेखले वेष्टइण्डिजविरुद्ध दोस्रो खेलमा र वार्मअप खेलमा ओमानविरुद्ध अर्धशतक प्रहार गरेका थिए ।

यी दुई ओपनर २०२१ देखि खेल्दै आएको हुँदा साझेदारी पनि राम्रो बन्ने गरेको छ । त्यसैले ओपनरमा परिवर्तनको सम्भावना छैन ।

तेस्रो नम्बरमा कप्तान रोहित पौडेल हुनेछन् । चौथो नम्बरमा कुशल मल्ल र पाँचौं नम्बरमा सन्दीप जोराको सम्भावना छ । वेष्ट इण्डिजविरुद्ध दोस्रो खेलमा जोराले अर्धशतक प्रहार गरेका थिए ।

पछिल्लो समय नेपाल ‘ए’ बाट पनि मध्यक्रममा राम्रो गरेको हुँदा जोरालाई पाँचौं नम्बरमा खेलाउने सम्भावना देखिन्छ । जोरा खेल्दा आदिल आलम भने बेन्चमा बस्नुपर्ने हुन्छ ।

एक पार्टटाइम तीव्र गतिका बलरमा आलम र गुल्शन झा मध्यको सम्भावना छ । जस्मा गुल्शन लगातार टोलीमा हुँदा उनी रोजाईमा पर्ने देखिन्छ ।

छैटौं नम्बरमा दीपेन्द्रसिंह ऐरी हुनेछन् । दीपेन्द्र ब्याटिङमा संघर्ष गर्दा छनोटको पहिलो खेलमै नेपाल राम्रो प्रदर्शन चाहन्छ । बलिङ र फिल्डिङमा भने लगातार उच्च प्रदर्शन गर्दै आएका छन् । त्यसपछि बाँकी चार ब्याटिङ नम्बरमा करण केसी, सोमपाल कामी, नन्दन यादव र गुल्शन झा हुनेछन् ।

गुल्शन सातौं र करण आठौं नम्बरमा सम्भावना छ । नवौंमा सोमपाल र दशौंमा नन्दन यादवको सम्भावना देखिन्छ । अन्तिम नम्बरमा सन्दीप लामिछाने खेल्ने सम्भावना छ । नेपाल आफ्नो १० नम्बर ब्याटिङ नम्बरका खेलाडीसम्म जितको विश्वास राख्नेछ ।

नेपालको तीव्र गतिमा पावर प्लेमा करण र सोमपाल हुनेछन् । डेथ ओभरमा नन्दन हुनेछन् । नेपालले पावर प्लेमा एक दुई ओभर नन्दन यादवबाट पनि गर्नेछ । स्पिनर सन्दीप लामिछानेको मध्यक्रममा भूमिका महत्वपूर्ण हुनेछ ।

दीपेन्द्र पावर प्लेमा स्पिनका साथ आउन सक्छन् । मध्यक्रममा दीपेन्द्रसँगै कुशल भुर्तेल र कुशल मल्ल पनि स्पिन आक्रामणमा हुनेछन् । आवश्यक परेका कप्तान रोहित आफैं अफ स्पिनमा आउनेछन् ।

कुवेतविरुद्ध नेपालको सम्भावित ११

कुशल भुर्तेल, आसिफ शेख(विकेटकिपर), रोहित पौडेल(कप्तान), कुशल मल्ल, सन्दीप जोरा, दीपेन्द्रसिंह ऐरी, करण केसी, सोमपाल कामी, नन्दन यादव, गुल्शन झा र सन्दीप लामिछाने ।