काठमाडौं (हाम्रो खेलकुद)- दोस्रो नेपाल प्रिमियर लिग (एनपिएल) मा आज दुई खेल हुँदैछन्। पहिलो खेलमा चितवन राइनोजको सामना पुछारमा रहेको जनकपुर बोल्ट्सले गर्देछ।

टियु क्रिकेट स्टेडियममा टस जितेर चितवनका कुशल मल्लले पहिले ब्याटिङ रोजे। चितवन र जनकपुरले दुबै टोलीले दुई परिवर्तन गरेका छन्। जनकपुरले कप्तानमा वायन पार्नेललाई नै निरन्तरता दिंदा ललित नारायण राजवंशी र किशोर महतोलाई ड्रप गरेको छ। अनिल शाह र सविन भट्टलाई प्लेइङमा राखेको छ ।

चितवनले अमरसिंह राउटेला र सौगात ढकाललाई खेलाउँदा रिजन ढकाल र दीपक बोहरालाई ड्रप गरेको छ।

चितवन र जनकपुर दुवैलाई प्ले अफ संभावना कायमै राख्न जितको विकल्प छैन। दुवै टोलीको आज पाँचौं खेल हो। ४ खेलमा २ जित र २ मा हार बेहोरेको छ। चितवनको ४ अंक छ। चितवन काठमाडौं गोर्खाज र लुम्बिनी लायन्ससँग पराजित हुँदा विराटनगर किङ्स र कर्णाली याक्सलाई हराउन सफल भएको छ।

तुलनात्मक रुपमा चितवन भन्दा जनकपुर बलियो छ। उसले अंकको खाता खोल्न सकेको छैन। लगातार ४ खेलमा हार बेहोरेको जनकपुरको गणितीय संभावना मात्र बाँकी छ। त्यसैले जनकपुरलाई जितको विकल्प छैन। हारले साविक विजेता जनकपुरको प्ले अफ संभावना सकिनेछ।

आज दोस्रो खेलमा पोखरा एभेन्जर्स र कर्णाली याक्सबीच प्रतिस्पर्धा हुनेछ।