काठमाडौं (हाम्रो खेलकुद)- दोस्रो नेपाल प्रिमियर लिग (एनपिएल) मा आज पोखरा एभेन्जर्सले कर्णाली याक्सलाई जितको लागि २ सय २ रनको विशाल चुनौती दिएको छ।

टियु क्रिकेट मैदानमा टस जितेर कर्णालीका कप्तान सोमपाल कामीले बलिङ रोजे। पोखराले २० ओभरमा २ विकेट गुमाउँदै २ सय १ रनको ठूलो योगफल खडा गर्यो।

चौथो ओभरको पाँचौं बलमा ओपनर कुशल भुर्तेल १८ रन जोडेर मार्क वाटको बलमा आउट भए। पहिलो विकेट गुमाउँदा ३४ रन बनाएको पोखराले पहिलो पावर प्ले‌मा ४४ रन बनायो।

वान डाउनमा क्रिजमा छिरेका इङ्गल्याण्डका जेसन रोयको पहिलो खेल हो। जेसन र एडम रोसिङ्गटनले १० ओभरको समाप्तिमा टोलीको स्कोर ८५ पुर्याए।रोसिङ्गटनले ३० बल खेल्दै ७ चौका र २ छक्का प्रहार गर्दै अर्धशतक बनाए।

जेसन र रोसिङ्गटनको साझेदारी तोड्न कर्णालीका बलरलाई ७१ बल नै कुर्नुपर्यो। यी दुईले दोस्रो विकेटको लागि १ सय २७ रनको उत्कृष्ट साझेदारी गरे। यो जारी लिगको दोस्रो सर्वाधिक साझेदारी हो। जेसनले ३४ बलमा २ चौका ३ छक्का सहित ४६ रन जोडे। नन्दनको बलमा उनी आउट भए।

तर यसपछि रोसिङ्गटनले १९ औं ओभरमा चौका प्रहार गर्दै सतक बनाए। उनले ५४ बल खेल्दै ११ चौका र ६ छक्का सहित शतकको सफलता प्राप्त गरे। उनले बाउन्ड्रीबाट मात्र ८० रन बटुले ।

जारी सिजनको यो दोस्रो शतक हो। यसअघि कर्णालीका मार्क वाटले लुम्बिनी लायन्सविरुद्ध शतक बनाएका थिए। धनन्जय लक्सन ११ बल खेल्दै अविजित २३ रनमा रहे।

कर्णाली बलिङमा निकै कमजोर रहयो। उसको लागि नन्दन र वाटले समान १ विकेट ट लिए। कप्तान सोमपाल सबैभन्दा महङ्गो बलर बने। उनले ४ ओभरमा ५० रन दिएर विकेट लिन सकेनन्।

यसअघि आज भएको पहिलो खेलमा साविक विजेता जनकपुर बोल्ट्सले पहिलो जितका साथ प्ले अफको संभावनालाई कायमै राखेको छ।

उच्च योगफलको खेलमा जनकपुरले चितवन राइनोजलाई ६ विकेटले पराजित गरेको छ। जनकपुरको जितमा माज सदाकत र अनिल साहले अर्धशतक बनाए।