काठमाडौं, असोज १५ गते ।
पारस खड्कालाई राष्ट्रिय क्रिकेट टोलिको कप्तान पदबाट नहटाइएको नेपाल क्रिकेट संघ (क्यान) ले स्पष्ट पारेको छ ।
- केही सञ्चारमाध्यमले पारसलाई कप्तानबाट हटाइएको समाचार प्रकाशित गरेका थिए । त्यो समाचारको खण्डन गर्दै क्यानका कार्यवहाक अध्यक्ष दीपक कोइरालाले बुधबारको बैठकमा त्यस्तो कुनै एजेन्डा नरहेको बताएका छन् । उनले भने, कप्तानको विषयमा एजेन्डा थिएन । बैठकमा सबै विषयमा छलफल हुँदा पारसको बारेमा केही कुरा चलेको हो । तर, त्यसको मतलब कुनै निर्णय भएको छैन ।
क्यानका कार्यवहाक महासचिव उत्तम कर्माचार्यले पारसका विषयको भूमिकाका विषयमा कुरा उठेको बताएका छन् । उनको भनाईले क्यानप्रति गलत सन्देश गएको भन्ने उठेको हो । तर, त्यो कारवाहीको तहमा गएको होइन ।
पारसले आफुलाई हटाइएको कुनै जानकारी नआएको जनाउँदै भने, मलाई कुनै जानकारी छैन । तथापी कप्तान पद स्थाइ होइन भन्ने मलाई राम्ररी थाहा छ । मेरो लागि कप्तान होइन, क्रिकेट टोली ठूलो हो । पछिल्लो केही बर्षयता पारसले क्यानको व्यवस्थापन, क्यान पदाधिकारीका विषयमा प्रश्न उठाउँदै आएका छन् ।
