राँची (एजेन्सी)– सन मार्श र पिटर ह्यान्ड्सकमको धर्यतापूर्वक साझेदारी गरेपछि अस्ट्रेलियाले तेस्रो टेस्ट क्रिकेटमा भारतलाई बराबरीमा रोक्न सफल भएको छ । ४ टेस्टको श्रृखंलाको पहिलो टेस्टमा अस्ट्रेलिया र दोस्रो टेस्टमा भारत विजयी भएको थियो ।
तेस्रो टेस्टको अन्तिम दिन मंगलबार मार्श र ह्यान्ड्सकमले पाँचौं विकेटका लागि १ सय २४ रन साझेदारी गरेपछि भारतको सम्भावित जित टरेको थियो । अस्ट्रेलियाले दोस्रो इनिङ्समा ६ विकेट गुमाउदै २ सय ४ रन बनाएको अवस्थामा पाँचौ दिनको खेल टुंगिएको थियो ।
पहिलो इनिङ्समा अस्ट्रेलियाले ४ सय ५१ र भारतले ६ सय ३ रन बनाएको थियो । दोस्रो इनिङ्समा १ सय ५२ रनले पछि परेको अवस्थामा अस्ट्रेलियाले कप्तान स्टेभन स्मिथलाई गुमाउदा ६३ रन मात्र बनाएको थियो । तर १ सय ९७ बलको सामना गर्दै मार्शले ५३ रन र २ सय खेल्दै ह्यान्ड्सकमले ७२ रन जोडेपछि अस्ट्रेलियाको सम्भावित हार जोगिएको थियो ।
बलिङमा भारतका रविन्द्र जडेजाले ४ तथा रविचन्द्रन अश्विन र इशान्त शर्माले समान १ विकेट लिए । पहिलो इनिङ्समा कप्तान स्मिथले अविजित १ सय ७८ रन र ग्लेन म्याक्सवेलको १ सय ४ रन जोडेपछि अस्ट्रेलिया ४ सय ५१ रन बनाएको थियो । भारतका लागि जडेजाले ५ र उमेश यादवले ३ विकेट लिएका थिए ।
चेतेश्वर पुजाराको दोहोरो शतक (२०२) र ऋद्दिमान शाहको १ सय १७ रनको मद्दतमा ६ सय ३ रन बनाउँदै पहिलो इनिङ्स समाप्तीको घोषणा गर्दा भारतले १ सय ५२ रनको अग्रता लिएको थियो ।
