धर्मशाला (एजेन्सी) – भारतबिरुद्धको चौथो तथा अन्तिम टेस्टको पहिलो दिनमा अस्ट्रेलियाको पहिलो इनिङ्स ३०० रनमा सिमित भएको छ । कुलदिप यादवको ४ विकेटको मद्धतले भारतले निर्णायक टेस्टमा राम्रो सुरुवात गरेको हो ।

हिमाञ्चल प्रदेश एसोसिएसन क्रिकेट स्टेडियम धर्मशालामा शनिबार बाट शुरु भएको चौथो तथा अन्तिम टेष्टको पहिलो दिन नै अष्ट्रेलिया ३ सय रनमा अलआउट भएको हो । अष्ट्रेलियाका लागि कप्तान स्टिभ स्मिथले शतकीय इनिङ्स खेले । उनको यो खेल जीवनको २० औं टेष्ट शतक हो । स्मिथको यो शतक भारतविरुद्ध खेलिएको पछिल्ला ८ टेष्टमा सातौ हो । १ सय ७३ बलको सामना गरेका स्मिथ १ सय ११ रन बनाएको अवस्थामा रविचन्द्रन आश्विनको बलमा अजिन्क्या रहानेबाट क्याच आउट भए ।

१० रनको स्थितिमा पहिलो विकेटको रुपमा ओपनर म्याट रेन्सा एक रनमा लाई गुमाएको अष्ट्रेलियाका लागि म्याथ्यु वेडले ५७ तथा डेभिड वार्नरले ५६ रनको अर्धशतकीय इनिङ्स खेले । पाट कमिन्स २१ तथा नाथन लियोन १३ रनमा आउट हुदा अन्य ब्याट्सम्यानहरुले दोहोरो अंकको योगफल छुन सकेन ।

भारतका लागि कुलदिप यादवे चार तथा उमेश यादवले दुई विकेट लिए । भुवनेश्वर कुमार, रविचन्द्रन आश्विन र रविन्द्र जडेजाले समान एक–एक विकेट लिए । शनिबारै भारतले पहिलो इनिङ्स शुरु गरेको छ । एक अ‍ोभर खेल्दा भारतले रन जोड्न सकेको छैन ।