धनगढी (हाम्रो खेलकुद) – ‘गर या मर’ को स्थितिमा रहेको धनगढी टिम चौराहले काठमाडौँ गोल्डेन्सलाई ११ रनले पराजित गर्दै प्रतियोगितामा पहिलो जित दर्ता गरेको छ। प्रतियोगिताको चौथो खेलमा पहिलो जितसंगै चौराहको ‘प्ले अफ’ मा पुग्ने सम्भावना जिवितै रहेको छ। काठमाडौँले भने आफ्नो पाँचौ खेल खेलिसक्दा दुइ जित र तिन हारको सामना गरेको छ।

टस जितेर पहिले ब्याटिङ रोजेको चौराहले निर्धारित २० ओभरमा ८ विकेट गुमाउदै १३६ रन बनाएको थियो। ४५ बलको सामना गर्दै ५८ रन बनाएका आरीफको उत्कृष्ट इनिङस मद्दतले चौरहको पारी सम्हालिएको थियो। जारी प्रतियोगितामा कमजोर प्रदर्शन गरिरहेका कप्तान पारस खड्का यस खेलमा पनि गोल्डेन डक आउट भए। आरिफले ५ चौका र ३ छक्का प्रहार गरेका थिए। प्रतियोगितामा बलरलाई समर्थन गरेको यो पिचमा दोस्रो अर्धशतक हो भने प्रतियोगिताकै व्यक्तिगत सर्वाधिक स्कोर पनि हो। यसअघि अत्तरियाकालागि योगेन्द्र सिंह कार्कीले गोल्डेन्सविरुद्धनै ५७ रन बनाएका थिए।

टिम चौराहकालागि पारीको सुरु गरेका अनिल मण्डलले २९ बलमा २९ रन जोडे भने सौरभ खनालले ८ बल खेल्दै १६ रनको योगदान दिए। बलिङतर्फ गोल्डेन्सका लागि सोमपाल र मन्जितले ३ विकेट लिए भने वसन्त रेग्मी र सन्तोष भट्टले १ विकेट लिए ।

१३७ रनको लक्ष्य पछ्याएको गोल्डेन्सका लागि पुन: ओपनरले निराश बनाए। नरेश बुढाएर र सुबेन्दु पाण्डे ओभरमै पेभेलियन फर्किसकेका थिए। सोमपाल कामी र कप्तान बसन्तले पारीलाई सम्हाल्ने कोसिस गरेपनि ११ रनमा बसन्त आउट भएपछि गोल्डेन्समाथि थप दबाब आएको थियो। रामनरेश गिरीको बलमा बोल्ड हुनु अघि सोमपालले १८ बलमा २४ रन जोडे।

सातौं विकेटका लागि सन्दिप जोरा र रोहित पौडेलले ६ ओभरमा ५२ रन जोडेपछि गोल्डेन्स खेलमा फर्कने आशा जागेको थियो। तर आरीफ शेखले दुवै ब्याट्सम्यानलाई आफ्नो चौथो ओभरमा आउट गर्दै चौराहको पकड बलियो बनाए। सन्दिपले २ छक्का र १ चौकको मद्दतले २८ रन बनाउदा रोहितले १२ रन जोडे।

बलिङतर्फ चौराहका आरीफ शेख र सौरभ खनालले ३/३ विकेट लिए भने रामनरेश गिरीको नाममा २ विकेट रह्यो। खेलमा अलराउण्ड प्रदर्शन गरेका चौराहका आरीफ शेख म्यान अफ द म्याच भए।