धनगढी(हाम्रो खेलकुद) – धनगढी प्रिमिएर लिग अन्तर्गत आइतबारको पहिलो खेलमा रुपन्देही च्यालेन्जर्सले बिराटनगर किङ्सलाई ६१ रनले पराजित गरेको छ। चार खेलमा चौथो जितसंगै रुपन्देहिले लिग चरणमा आफ्नो शीर्षस्थान पक्का गरेको छ।

अंचल प्रहरी कार्यालयको मैदानमा टस जितेर ब्याटिङ रोजेको रुपन्देहीले निर्धारित २० ओभर खेल्दै ८ विकेटको क्षतिमा १३२ रनको योगफल तयार परेको थियो। ओपनर शंकर रानालाई शुन्यमा गुमाएको रुपन्देहीका लागि अर्का ओपनर हरिशंकर साहले १४ रन प्रहार गरे। पछिल्लो खेलमा राम्रो प्रदर्शन गरेका नुरध्वज सेनले ७ रन मात्र जोड्न सके। पुष्प थापाले १७ रन बनाए भने राजेश पुलामी मगर १ रन बनाउदै दोश्रो बलमा पेभेलियन फर्के।

रुपन्देहीका लागि अन्तिम थापाले उत्कृष्ट ब्याटिङ गर्दै ४२ बलमा १ छक्का र ५ चौकाको मद्दतले ४५ रन बनाएका थिए। उनले कृष्ण कार्कीसंग मिलेर सातौं विकेटका लागि ४.२ ओभरमा ४७ रन जोडेपछि टोलीले राम्रो स्कोर खडा गरेको थियो। कृष्णले १६ बलमा २ छक्का र १ चौकाको मद्दतले २२ रन बनाए। बिराटनगरको लागि सुशील कँडेल र दिपेन्द्र सिंह ऐरीले २/२ विकेट लिएका थिए। पवन शर्राफ, सन्दिप लामिछाने, शरद भेषावकर र किशोर महतोले १/१ विकेट बाँडे।

१३३ रनको लक्ष्य पछ्याएको बिराटनगरले एकदम खराब सुरुवात गरेको थियो। दिपेश श्रेष्ठले पारीको दोश्रो बलमै ओपनर राकेश कर्ण कट बिहाईन्ड गराउँदा तेश्रो ओभरमा आसिफ शेखलाई बोल्ड र दिपेन्द्र सिंह ऐरिलाई क्याचआउट गराए। १० रनको स्थितिमा ३ विकेट गुमाएको बिराटनगरको लागि कप्तान्न शरद भेषावकरले मात्र दोहोरो अंकमा स्कोर बनाए।

प्रतियोगितामा उत्कृष्ट प्रदर्शन गरिरहेका साहब अलामले आफ्नो फर्मलाई जारी राख्दै ४ विकेट लिए। उनले पहिलो स्पेलमा आकाश थापा (८), प्रनित थापा मगर (०), र अनिल शाह(३)को विकेट लिए। पवन शर्राफले ३ रन जोड्दै कृष्ण कार्कीको बलमा आउट भए। शरद भेषावकरले ४७ बलमा २ छक्का र १ चौकाको मद्दतले ३४ रन जोडे। उनलाई साहब आलमले आउट परेका थिए। प्रतियोगिताकै कम स्कोर बनाउने क्रममा रुपन्देहीले आफ्नो सबै विकेट १८.१ ओभर खेल्दै ७१ रनमा गुमाएको थियो। रुपन्देहीका लागि साहब आलमले ४ तथा दिपेश श्रेष्ठ र कृष्ण कार्कीले ३/३ विकेट लिए।

खेलको म्यान अफ द म्याच रुपन्देहीका साहब आलम भए।