धनगढी (हाम्रो खेलकुद) – नेपाली क्रिकेटको विवाद समाधानको सुझाव दिन अन्तर्राष्ट्रिय क्रिकेट परिषद् (आईसीसी) ले बनाएको सल्लाहकार समितिले सोमबार सुदूरपश्चिम क्षेत्रका क्रिकेटका सरोकारवालाससँग छलफल गरेको छ । आईसीसीले गत बर्ष नेपाल क्रिकेट संघ(क्यान) लाई निलम्बन गरेपछि त्यसको निकासका लागि सल्लाहकार समिति गठन गरेको थियो ।

नयाँ विधान बनाएर क्यानको निर्वाचन गराउन आईसीसीले सल्लाहकार समितिलाई म्यानडेट दिएको छ । सोही क्रममा सल्लाहकार समितिका संयोजक मध्येका एक विनयराज पाण्डे र सचिव पवन अग्रवाल सगरमाथा सिमेन्ट धनगढी प्रिमियर लिग (डिपिएल) को संयोग पारेर शुक्रबार धनगढी आएका छन् । डिपिएलको फाइनल हुने शनिबारमा पारस खड्काको कप्तानीमा रहेको धनगढी टिम चौराहा र शरद भेषावकरको नेतृत्वमा रहेको विराटनगर किङसबीच प्रतिस्पर्धा हुँदैछ ।

छलफलमा क्रिकेटका स्थानिय सरोकारवालाहरुले जिल्लाको प्रतिनिधि चयनका लागि साधारण सभामा हुनु पर्ने, साधरण सभाका प्रतिनिधि संख्या बढाउनुपर्ने माग उठेको सल्लाहकार समितिका सचिव अग्रवालले जानकारी दिए ।

छलफलमा बैतडीका तेजप्रकाश भट्ट र रमेशबहादुर बोहरा, दार्चुलाबाट जयन्ती भट्ट, डडेलधुराको बासुदेव जोशी तथा डोटिबाट दिनेश सिंह कञ्चनपुरका विरेन्द्रबहादुर चन्द र आशिष खत्री, कैलालीबाट विक्रम विष्ट, रतन कठायत र हरि रेग्मीको सहभागिता रहेको बताइएको छ । सल्लाहकार समितिले यसअघि वीरगन्जमा पनि सरोकारवालासँग छलफल गरेको थियो । अर्का संयोजक वसन्त चौधरी रहेको सल्लाकार समिति ८ सदस्यीय छ ।