धनगढी (हाम्रो खेलकुद) – धनगढी प्रिमिएर लिग अन्तर्गत एस.एस.पी मैदानमा जारी फाइनल टस जितेर खेलमा पहिलो ब्याटिङ गरेको टिम चौराहा धनगढीले बिराटनगर किङ्सलाई १ सय ६० रनको लक्ष्य दिएको छ।

४ रनको स्थितिमा दुवै ओपनरलाई गुमाएको चौराहाले मध्यक्रमको ब्याट्सम्यानले उत्कृष्ट प्रदर्शन गरेपछि निर्धारित २० ओभरमा ५ विकेट गुमाउँदै १ सय ५९ रन जोडेको थियो। ओपनर राजु रिजाल शुन्यमा आउट भए भने अनिल कुमार मण्डलले २ रन मात्र जोडेका थिए। दुवै ओपनरलाई सुशील कँडेलली पेभेलियन फर्काएका थिए।

कप्तान पारस खड्का र पृथु बास्कोटाले तेश्रो विकेटका लागि ३३ रन जोड्दै पारीलाई सम्हालेका थिए। पृथु १४ रन जोड्दै आउट भएपछि आरिफले रनको गति बढाएका थिए। उनले कप्तान पारस खड्कासंग ५.३ ओभरमा ४४ रनको साझेदारी गरे भने पाँचौ विकेटका लागि अमर सिंह राउटेला संग मिलेर ४ ओभरमा ६३ रन जोडे। कप्तान पारस ३४ बलमा २९ रन जोड्दै प्रकाश बिष्टको बलमा क्याचआउट भएका थिए।

आरीफले प्रतियोगिताकै सबैभन्दा तेज अर्धशतक प्रहार गर्ने क्रममा ५४ रन जोडे। २८ बलमा अर्धशतक बनाएका आरीफले ४ चौका र ४ छक्का प्रहार गरेका थिए। पारीको अन्त्यतिर आएका अमर सिंह राउटेलाले आक्रामक ब्याटिङ गर्दै १५ बलमा अविजित ३१ रन बनाए भने सौरभ खनालले पनि अविजित रहँदै ५ बलमा १४ रन जोडे।

बिराटनगरका लागि सुशील कँडेलले २ विकेट लिए भने जितेन्द्र मुखिया, सन्दिप लामिछाने र प्रकाश बिष्टको नाममा १/१ विकेट रह्यो। सुरुको २ ओभर मेडन फालेका जितेन्द्रले अन्तिम २ ओभरमा ३१ रन खर्चेका थिए।