काठमाडौं (हाम्रो खेलकुद) – अन्तर्राष्ट्रिय क्रिकेट परिषद् (आईसीसी) ले विगत १५ महिनादेखि रोकिएको नेपाली राष्ट्रिय क्रिकेट खेलाडीको तलब उपलब्ध गराउने भएको छ।
आईसीसीको बिहिबार बसेको बोर्ड बैठकले नेपाली खेलाडीको रोकिएको१५ महिनाको तलब उपलब्ध गराउने निर्णय गरेको हो । क्यानले जारी गरेको विज्ञप्तिमा लेखिएको छ, ‘क्यान निलम्बन फुकुवा समधानतर्फ गइरहेको छ । जुन कारण आईसीसी नेपाली राष्ट्रिय खेलाडीलाई तलब उपलब्ध गराउन सहमत भयौं । खेलाडीले रोकिएको तलब छिट्टै पाउनेछन्।’ दुवईमा बसेको आइसीसीको डेभलपमेन्ट कमिटिले क्यान विवाद समाधानतर्फ उन्मुख भएकाले तलब भत्ता उपलब्ध गराउने प्रस्ताव स्वीकृत गरेको हो ।
क्यानमा सरकारी हस्तक्षेप भएको भन्दै आईसीसीले २०७३ वैशाखमा क्यानलाई निलम्बन गर्ने निर्णय गरेको थियो । निलम्बनसँगै आईसीसीले क्यानको बैंक खाता रोकेको थियो । नेपाल क्रिकेट संघ (क्यान) निलम्बनमा परेपछि आईसीसीले विभिन्न अन्तर्राष्ट्रिय खेल खेल्न पाउने व्यवस्था गरेपनि तलब भत्ता भने रोकिएको थियो ।
क्यान विवाद समाधानका लागि आईसीसीले गत कात्तिकमा क्यानका पूर्वअध्यक्ष विनयराज पाण्डे र व्यवसायी वसन्त चौधरीको संयोजकत्वमा सल्लाहकार समिति गठन गरेको थियो ।
