काठमाडौं (हाम्रो खेलकुद)– राष्ट्रिय क्रिकेट टोलीका सदस्यको १५ महिनादेखि रोकिएको पारिश्रमिक दिने अन्तर्राष्ट्रिय क्रिकेट परिषद(आइसिसी) को कदमको राष्ट्रिय खेलकुद परिषद् (राखेप) ले स्वागत गरेको छ । गत बर्ष वैशाखमा आन्तरिक विवादमा परेको नेपाल क्रिकेट संघ (क्यान) माथि निलम्बन गरेको आइसिसीको बिहीबार बसकेको बैठकले खेलाडीको पारश्रमिक दिने निर्णयक गरेको थियो ।

राखेपका प्रेस सल्लाह रोहित दाहालले शुक्रबार विज्ञप्ती जारी गर्दै आइसिसीको पछिल्लो निर्णयक गर्नुका साथै अन्योलमा रहेको नेपाली क्रिकेटको विवाद समाधान उन्मूख रहेको सन्देश दिएको उल्लेख गरेका छन् ।

उनले विज्ञप्तीमा खेलाडीको पारिश्रमिक दिन राखेपले दुई पटक सम्म पत्रचार गरेको स्मरण गर्दै भनेका छन्, ‘हामीले बाराम्बर सार्वजनिक कार्यक्रममा क्रिकेटको निलम्बन फुकुवा गर्नेमा आईसीसी सकारात्मक छ भन्दै आएका थियौं । हामीले उक्त कुरा प्रचारवाजीका लागि मात्र भनेका थिएनौं ।’

विज्ञप्तीमा अगाडि भनिएको छ, ‘हामीले आईसीसीलाई क्यानको निलम्बन फुकुवा र खेलाडीको पारिश्रमिकउपलब्ध गराउने सम्बन्धमा आईसीसीलाई दुई पटकपत्राचार समेत गरेका थियौं । खेलाडीलाई पारिश्रमिक उपलब्ध गराउने निर्णय आईसीसीले गर्नुमा राखेपको मुख्य भूमिका त छँदैछ सरोकारवाला सबै पक्षको प्रयास पनि उत्तिकै महत्वपूर्ण छ । ’

आइसिसीको पछिल्लो निर्णयले राखेपसहित खेलाडी तथा आम क्रिकेटप्रेमीले राहत महसुस गरेको राखेपको बुझाई रहेको बताइएको छ । ‘आइसीसीको निर्णयले नेपाली खेलाडीमा उत्साह थप्ने छ भने नेपाली क्रिकेटको विकासमाथप मद्दत पुग्नेछ । आइसीसीको पछिल्लो निर्णयले क्यानको निलम्बन चाँडै नै फुकुवा हुनेमा विश्वस्त हुने वातावरण सिर्जना गरेको छ,’ क्रिकेट विवाद समाधान सल्लाकार समितिका सदस्य समेत रहेको दाहालले जारी गरेको विज्ञप्तीमा भनिएको छ ।

क्यान निलम्बन भएको अवस्थामा पनि राखेपले क्रिकेटको गतिविधिलाई सुस्ताउन नदिने उल्लेख गर्दै जस लिने क्रममा राखेपले विज्ञप्तीमा भनेको छ, ‘राखेप प्रत्यक्ष/अप्रत्यक्ष संलग्नतामानिरन्तर घरेलुका साथै अन्तर्राष्ट्रिय क्रिकेट प्रतियोगितामा नेपाली राष्ट्रिय पुरुष/महिला टोली सहभागी हुँदै आएका छन् ।’

राखेपले चाँडै नै प्रधानमन्त्री कप राष्ट्रिय क्रिकेट प्रतियोगिता आयोजना गर्न लागेको पनि सोही विज्ञप्तीमा जनाइएको छ । साथै यसै आर्थिक वर्षमा क्रिकेटको पूर्वाधार निर्माण गर्ने तर्फ राखेप अग्रसर हुने जनाइएको छ ।

आन्तरिक विवादका कारण निलम्बनमा परेको आइसिसीले विवाद समाधानका लागि सल्लाहकार समिति गठन गरेको छ । क्यानका पूर्व अध्यक्ष विनयराज पाण्डे र उद्योगपति बसन्त चौधरी संयोजक रहेको सल्लाकार समितिमा दाहाल पनि सदस्य छन् ।

समितिको बैठक पटक पटक बसेपछि नेपालको क्रिकेट विवाद समाधानको खाका भने सार्वजनिक भएको छैन । समितिले वीरगन्ज र केही दिनअघि धनगढी प्रिमियर लिगका दौरान स्थानिय सरोकारवालासँग छलफल गरेको थियो ।