कोलकाता (एजेन्सी) – कप्तान गौतम गम्भीर र रोबिन उथाप्पाले लगातार दोश्रो शतकीय साझेदारी गरेपछि कोलकाता नाइट राइडर्सले दिल्ली डेयरडेभिल्सलाई ७ विकेटले पराजित गरेको छ।
खेलमा पहिलो ब्याटिङ गरेको दिल्लीले निर्धारित २० ओभरमा ६ विकेट गुमाउँदै १ सय ६० रन जोडेको थियो। ओपनर सन्जु स्याम्सनले ३८ बलमा ६० रन जोडे भने श्रेयस ऐरले ३४ बलमा ४७ रन बनाएका थिए। अन्य ब्याट्सम्यानले ठुलो स्कोर बनाउन नसक्दा दिल्लीको अन्त्य खराब भएको थियो। कोलकाताका लागि नाथन कोल्टरनाइलले ३ विकेट लिए भने उमेश यादव र सुनिल नारायणले १/१ विकेट बाँडे।
जवाफी ब्याटिङमा उत्रिएको कोलकाताले फर्ममा रहेका ओपनर नारायणलाई दोश्रो ओभरमै गुमायो। तर कप्तान गम्भीर र उथाप्पाले फेरी एकपटक शतकीय साझेदारी गरेपछि कोलकाताले सहज जित दर्ता गर्यो। १ सय ८ रनको साझेदारीमा उथाप्पाले आउट हुनुअघि ३३ बलमा ५९ रन जोडे। म्यान अफ द म्याच समेत रहेका गौतम गम्भीरले ५२ बलमा अविजित ७१ रनको उत्कृष्ट पारी खेले। दिल्लीका लागि कागीसो रबाडाले २ विकेट लिएका थिए।
