दिल्ली (एजेन्सी) – इन्डियन प्रिमियर लिग अन्तर्गत आइतबार भएको खेलमा किङस इलेभेन पन्जाबले दिल्ली डेयरडेभिल्सलाई १० विकेटले पराजित गरेको छ।
टस जितेर पहिलो फिल्डिङ रोजेको पन्जाबले उत्कृष्ट बलिङ प्रदर्शन गर्दै दिल्लीलाई ६७ रनमा अलआउट गर्यो। दिल्लीका लागि ३ ब्याट्स्म्यानले मात्र दोहोरो अंकमा स्कोर बनाएका थिए। दिल्लीका लागि कप्तान करुन नायरले ११, कोरी एन्डरसनले १८ र कागिसो रबाडाले ११ रन जोडेका थिए। पन्जाबका लागि सन्दिप शर्माले ३ विकेट लिए भने अक्षर पटेल र वरुण आरोनले २/२ विकेट आफ्नो नाममा गरे।
दिल्लीको ब्याटिङ १८औं ओभरसम्म मात्र टिकेको थियो। जवाफि ब्याटिङमा उत्रिएको पन्जाबले ७ ओभर ५ बलमै लक्ष्य प्राप्त गरेको थियो। ओपनर हसिम अमला र मार्टिन गप्टिलले अविजित रहँदै टोलीलाई जितसम्म पुर्याएका थिए। गप्टिलले २७ बलमा ५० रन बनाए भने हसिम अमलाले १६ रन जोडे। पन्जाबका सन्दिप शर्मा म्यान अफ द म्याच घोषित भए।
