कोलकाता (एजेन्सी) – ओपनर सुनिल नारायणले १५ बलमै अर्धशतक पुरा गरेपछि कोलकाता नाईट राइडर्सले इन्डियन प्रिमियर लिग अन्तर्गत आइतबार भएको खेलमा रोयल च्यालेन्जर्स बेंगलोरलाई ६ विकेटले पराजित गरेको छ।
१ सय ५९ रनको लक्ष्य पछ्याएको कोलकातालाई क्रिस लिन र नारायण मिलेर आक्रमक सुरुवात दिलाएका थिए। दुई ओपनर मिलेर ६ ओभरमा १ सय ५ रन जोडेका थिए। नारायणले १७ बलमा ५४ रन जोडेका थिए। लिनले २२ बलमा ५० रन बनाएका थिए। कोलिन डे ग्रान्डहोमले २८ बलमा ३१ रन जोडे।
पहिलो ब्याटिङ गरेको बेंगलोरले २० ओभर खेल्दै ६ विकेटको क्षतिमा १ सय ५८ रन बनाएका थिए। ट्राभीस हेडले ४७ बलमा ७५ रन बनाए भने मन्दिप सिंहले ५२ रन जोडे। उमेश यादवले ३ विकेट लिएका थिए। बेंगलोरका गेल, कोहली र डि भिलिएर्सको ब्याटबाट जम्मा १५ रन निस्केको थियो।
