धनगढी (हाम्रो खेलकुद) – कैलालीको अत्तरीयामा जारी रुस्लान अत्तरीया कपमा विभागीय टोली एपिएफ र राईजिङ क्रिकेट वुमनले उपाधिका लागि भिड्ने भएका छन । सोमबार भएका सेमिफाईनलमा जित हात पार्दै दुवै टोली उपाधिका लागि आमने सामने हुन लागेका हुन । दिनको दोस्रो सेमिफाईनलमा राईजिङ क्रिकेट वुमनले झापा क्रिकेट एकेडेमीलाई ९ रनले किनारा लगाउदै फाइनलमा स्थान बनाएको हो।

टस हारेर ब्याटिङको निम्तो पाएको राईजिङ क्रिकेट वुमनले २० ओभरमा ३  विकेट क्षतीमा ११९ रन वनायो । टीमका लागि पुजा निभा भाटले सर्वाधिक ४७ रन बनाईन भने साम्पा मुखर्जीले ४२ रनको अविजित पारी खेलिन। सहनाज प्रविणले १७ रन बनाईन । ११९ रनको योगफलसम्म आफ्नो टीमलाई पुर्याउने क्रममा पहिलो विकेटका लागि सहनाज र पुजाले ३३ रनको साझेदारी गरिन । यस्तै दोस्रो विकेटका लागि पुजा र साम्पाले ७२ रनको अर्धशतकीय साझेदारी गरिन् । झापाका लागि सरस्वती चौधरी २ र अनुराधा चौधरीले एक विकेट लिईन् ।

१२० रनको लक्ष्य लिएर मैदान उत्रिएको मिलन क्रिकेट एकेडेमीले निर्धारित २० ओभरमा सवै विकेट गुमाउदै ११० रन मात्रै वनाउन सक्यो । कप्तान रुवीना क्षेत्रीले ३९ रनको योगदान गरे पनि आफ्नो टीमलाई जिताउन सकिनन् । टोलीका लागि रितु जैन र मुस्कान वेगमले २१/२१ रन बनाईन् । दोस्रो विकेटका लागि रितु र रुविना वीच ५० रनको साझेदारी समेत भएको थियो । राईजिङ क्रिकेट वुमनलाई फाईनलमा पुर्याउनका लागि पुजा निभा भाटले ४ विकेट लिईन । ४ ओभर बलिङ गरेकी उनले २२ रन खर्चिन । नेरी थापाले पनि ४ ओभरमा १४ रन खर्चेर ३ विकेट हात पारिन । राईजिङ क्रिकेट वुमनकी पुजा निभा भाट वुमन अफ द म्याच हुदै नगद ३ हजार प्राप्त गर्न सफल भईन् ।

वैशाख २१ गतेदेखि सुरु भएको प्रतियोगिता मंगलवार सम्पन्न हुनेछ । यसअघि दिनको पहिलो सेमिफाइनल जितेको एपिएफ र राईजिङ क्रिकेट वुमन बीच मंगलवार दिउसो उपाधिका लागि प्रतिस्पर्धा हुने आयोजकले जनाएको छ ।