राजकोट (एजेन्सी) – युवा ब्याट्सम्यान श्रेयस ऐरले ५७ बलमा ९६ रनको उत्कृष्ट पारी खेलेपछि दिल्ली डेयरडेभिल्सले गुजरात लायन्सलाई २ विकेटले पराजित गरेको छ।
बुधबार राती खेलिएको इन्डियन प्रिमियर लिगको खेलमा १ सय ९६ रनको विशाल लक्ष्य पछ्याएको दिल्लीले १५ रनको स्थितिमा २ विकेट गुमाएपछि मुस्किलमा परेको थियो। तर, चौथो नम्बरमा ब्याटिङ गर्न आएका ऐरले १५ चौका र २ छक्काको मद्दतले पारी सम्हालेपछि दिल्लीले जित दर्ता गरेको थियो। ऐर अन्तिम ओभरको दोश्रो बलमा आउट भएका थिए। त्यसै ओभरको चौथो बलमा चौका प्रहार गर्दै अमित मिश्राले दिल्लीलाई जित दिलाएका थिए।
दिल्लीका लागि प्याट्रिक कमिन्सले १३ बलमा २४ रनको आक्रामक अन्त्य दिए भने माथिल्लो क्रममा करुण नायरको १५ बलमा ३० रन पनि महत्वपूर्ण रह्यो। गुजरातका लागि जेम्स फक्नरले २ विकेट लिएका थिए।
यसअघि पहिलो ब्याटिङ गरेको गुजरातले निर्धारित २० ओभरमा ५ विकेट गुमाउँदै १ सय ९५ रन जोडेको थियो। ओपनर इशान किसनले २५ बलमा ३४ रन जोडे भने दिनेश कार्तिकले २८ बलमा ४० रन बनाए। आरोन फिंचले ३९ बलमा ६ चौका र ४ छक्काको मद्दतले ६९ रन बनाएपछि गुजरात ठुलो स्कोरतर्फ उन्मुख भएको थियो। रबिन्द्र जडेजा १३(७) र जेम्स फक्नर १४(८)मा अविजित रहँदै टोलीलाई राम्रो अन्त्य दिलाएका थिए।
