एजेन्सी – इन्डियन प्रिमियर लिग अन्तर्गत शुक्रबार राती भएको खेलमा दिल्ली डेयरडेभिल्सले राइजिङ पुने सुपरजाएन्ट्सलाई ७ रनले पराजित गर्दै प्लेअफ समीकरणलाई थप रोमान्चक बनाएको छ।
पहिलो ब्याटिङ गरेको दिल्लीले ओपनर करुण नायरको ६४ रनको मद्दतले राम्रो स्कोर खडा गरेको थियो। उनले ४५ बल खेल्दै ९ चौका प्रहार गरेका थिए। ऋषभ पन्तले २२ बलमा आक्रामक ३६ रन जोडे भने मार्लोन स्यमुएल्सले २१ बलमा २७ रन बनाए। पुनेका जयदेव उनद्कट र बेन स्टोक्सले २/२ विकेट लिए। दिल्लीले निर्धारित २० ओभरमा ८ विकेट गुमाउँदै १ सय ६८ रन बनाएको थियो।
जवाफी ब्याटिङमा उत्रिएको पुनेले ओपनर अजिंक्या रहानेलाई पारीको पहिलो बलमै गुमाएको थियो। मध्यक्रममा मनोज तिवारीले ६० रनको उत्कृष्ट पारी खेलेपनि त्यो हार टार्न पर्याप्त रहेन। अन्तिम बलमा आउट हुनुअघि उनले ४५ बलमा ५ चौका र ३ छक्का प्रहार गरे। कप्तान स्टिभ स्मिथले नदिमको बलमा एलबिडब्लु हुनुअघि ३२ बलमा ३८ रन जोडे भने बेन स्टोक्सले २५ बलमा ३३ रनको पारी खेले। अन्य ब्याट्सम्यानले दोहोरो अंकमा रन बनाउन नसकेपछि पुनेले २० ओभरमा ७ विकेटको नोक्सानीमा १ सय ६१ रन बनाएको थियो। दिल्लीका जाहिर खान र महम्मद शामीले २/२ विकेट लिएका थिए।
