काठमाडौं (हाम्रो खेलकुद)– सुशन भारीले किफायती बलिङ गरेपछि राजधानीमा जारी प्रथम प्रधानमन्त्री कप एक दिवसिय क्रिकेट प्रतियोगितामा आइतबार त्रिभुवन आर्मी क्लबले अर्को विभागिय टोली नेपाल पुलिस क्लबलाई ७ विकेटले हराएको छ ।

कीर्तिपुरस्थित त्रिवि मैदानमा १ सय १० रनको लक्ष्य लिएर उत्रेको आर्मीले ३०.४ओभरमा ३ विकेट गुमाउँदै लक्ष्य पुरा गरेको थियो । झिनो लक्ष्य लिएर ब्याटिङ गरेका आर्मीले सुरुआतमा भने केही दबाब खेप्नु परेको थियो । ओपनरद्वय अनिल मण्डल र महेश क्षेत्री तथा अलराउन्डर सागर पुनलाई सस्तैमा गुमाउँदा आर्मीले केही समय दबाब झल्नु परेको थियो । यी तीन शीर्ष ब्याट्सम्यान आउट हुँदा टोलीले ३७ रनमात्र बनाउन सकेको थियो । तर कुनै रन प्रहार गर्नु अगावै अमित श्रेष्ठले क्याच छाडेर जीवन दान पाएका कप्तान विनोद भण्डारी र नरेश बुढाएरले चौथो विकेटका लागि अविजित ८० रनको साझेदारी गरेपछि आर्मीको जित सहज बनेको थियो ।

नरेशले ४१ र विनोदले ४६ रनको अविजित योगदान दिएका थिए । पुलिसका ललितसिंह भण्डारीले २ र सुशिल कँडेलले १ विकेट लिएका थिए । त्यसअघि टस हारेर पहिले ब्याटिङको निम्तो पाएको पुलिसले २५.५ ओभर सबै विकेट गुमाएर १ सय ९ रन बनाएको थियो ।

टस जितेर फिल्डिङ रोज्ने आर्मीको निर्णयलाई सुशनले सहि साबित गरे भने उनलाई अन्य बलरले राम्रो साथ दिए । पुलिसले सुरुआती दुई ओभरमै महत्वपूर्ण दुई विकेट गुमाएको थियो । खेलको पहिलो बलमा सुनिल धमलालाई गोल्डेन डक आउट गराएका सोमपाल कामीले छैटौं बलमा अमित श्रेष्ठको विकेट लिए । पुलिसको पारीलाई मजबुत बनाउने प्रयासमा दिलिप नाथले अर्धशतक पुरा गरेका थिए । तर अर्को क्रिजमा लगातार ब्याट्सम्यान आउट भएपछि पुलिस सस्तैमा समेटिएको थियो। नवौं विकेटका रुपमा आउट हुनुअघि उनले ५० रन पुरा गरेका थिए।

पुलिसका लागि दिपेन्द्र सिंह एरीले २२ रन जोडे । पुलिसका २ ओपनरसहित ५ खेलाडीले रनको खाता खोल्न सकेनन् । टोलीका अन्य सदस्य आरिफ शेखले ४, मन्जित श्रेष्ठले ६, सुशिलले ३ तथा ललितसिंहले २ रन जोडे । चार बलर मात्र प्रयोग गरेको आर्मीका लागि सुशन भारीले कसिलो बलिङ गरे । ७.५ ओभर बलिङ गरेका सुशनले मात्र १६ रन खर्चेर ६ खेलाडीलाई शिकार बनाएका थिए । त्यस्तै सोमपाल र सागरले समान २ विकेट लिए । आर्मीका सुशन म्यान अफ दी म्याच घोषित भए ।