मनोरञ्जन शर्मा
भैरहवा – कञ्चनपुरको अनिरुद्र उच्च मावि यहाँ जारी एक्सपर्ट क्रिकेट च्याम्पियनसिपको स्कुल लिग प्रतियोगिता सेमिफाइनल प्रवेश गरेको छ । सिद्धार्थ रंगशालामा सोमबार तनहुँको सत्यवती उच्च माविलाई ६३ रनले हराउँदै समूह विजेताका रुपमा अन्तिम चारमा पुगेको हो । सत्यवतीको २ खेलमा १ अंक छ । सेमिफाइनल प्रवेशका लागि अनिरुद्रले मंगलबार राजन ममोरियलको सामना गर्नेछ ।

टस जितेर ब्याटिङ गरेको अनिरुद्रले निर्धारित २० ओभरमा ८ विकेट गुमाउँदै १ सय ३० रनको योगफल तयार पारेको थियो । टोलीका साजन गौतमले ३०, भुवन सिंह पालले २३ र रविन साउदले २० रन बनाए । सत्यवतीका सुशिल गिरीले २ र रुपक बरालले १ विकेट लिए ।

१ सय ३१ रनको लक्ष्य पछ्याएको सत्यवती १९.३ ओभरमा ६७ रन मात्र बनाउन सक्यो । टोलीका बिपुल वाग्लेले १७ र रुपक बरालले १४ रन जोडे । अनिरुद्रका पारस केसीले ३ विकेट लिए । पारस क्षेत्री, रोशन साउद र भुवन सिंहले समान २ विकेट झारे । अनिरुद्रका पारस केसी म्यान अफ दी म्याच चुनिए ।

अर्को खेलमा रुपन्देहीको न्यू होराइजन उच्च माविले कैलालीको सिद्धार्थ सिशु सदनलाई ५८ रनले हरायो । टस जिटेर ब्याटिङ गरेको न्यू होराइजनले ३ विकेटको क्षेतिमा १ सय ६३ रन बनाएको थियो । टोलीका विशाल खत्रीले ४२ बलमा नटआउट ७१ रनको योगदान गरे । उनले ७ चौका र २ छक्का प्रहार गरे । त्यस्तै मौसम खाम्चाले ३२, प्रशान्त शर्मा २६, र विशाल बन्जाडेले १७ रन जोडे । सिद्धार्थका सौरभ हमालले २ र अमित अधिकारीले १ विकेट लिए ।

१ सय ६४ को लक्ष्य पछ्याएको सिद्धार्थ १६.२ ओभरमा अलआउट हुँदै १ सय ५ रन समेटिएको थियो । टोलीका आयुष ढकाल र सुदिप कार्कीको समान २० रन बनाउनु बाहेक अन्य खेलाडीले रन बटुल्न सकेनन् । न्यू होराइजनका सुरज श्रेष्ठले ३.२ ओभर ५ विकेट लिएर म्यान अफ म्याच घोषित भए । सन्दीप पाण्डे र प्रकाश गिरीले समान २ विकेट र कुशल मल्लले १ विकेट लिए । लगातार दोस्रो हारपछि सिद्धार्थ प्रतियोगिताबाट बाहिरिए छ ।