काठमाडौं (हाम्रो खेलकुद) – अर्को महिना राजधानीमा हुने एसियन प्रिमियर लिग (एपिएल) टि ट्वान्टी क्रिकेट प्रतियोगितामा ४ नेपाली खेलाडी विक्री भएका छन् ।

सोमबार राजधानीमा भएको अक्सनमा नेपाली खेलाडीमध्ये भूपेन्द्र सबैभन्दा बढी १ लाख ६० हजार रुपैयाँमा विक्रि भएका छन् । त्यस्तै सिद्धान्तराज शाही १ लाख १२ हजार रुपैयाँ, अमरसिंह रउटेला र राजवीर सिंह समान ९६ हजार रुपैयाँमा विक्री भएको बताइएको छ । नेपाली राष्ट्रिय क्रिकेट टोलीका सदस्य रहिसकेका परेश लोहनी भने आइकन खेलाडीका रुपमा रहेको अल्टिमेट स्पोट्स म्यानेजमेन्टका प्रमुख आर्रस धन्डीवालले बताएका छन् । चारै नेपाली खेलाडी नेपाल स्टोर्म क्लबबाट खेल्ने छन् ।

६ टोलीको सहभागितामा एपिएल असार ६ गतेदेखि कीर्तिपुरस्थित त्रिवि मैदानमा हुनेछ । नेपाल स्टोर्मको कप्तान युनाइटेड अरब इमिरेट्स (युएइ) का स्वप्निल पाटिल रहेका छन् । नेपाल स्टोर्मको स्वामित्व न्यूजिल्यान्डको इन्कोर इन्फ्रास्ट्रक्चर कम्पीका म्याच लिएमले लिएको सोमबार अक्सनका क्रममा जानकारी दिइएको थियो ।

सोमबार अक्सन चलिरहँदा क्रिकेट प्लेयर एसोसिएसन अफ नेपाल (सिप्यान) ले भने एपिएलको आयोजनाले स्थानिय खेलाडी र नेपाली क्रिकेटको विकासमा कुनै फाइदा नपुग्ने र आयोजनाको पारदर्शीतामाथि नै प्रश्न गरेको थियो ।