पोखरा (हाम्रो खेलकुद) – नेपाल क्रिकेट स्कुल (एनसिएस)लाई पराजित गर्दै मकवानपुर क्रिकेट एकेडेमी स्पोन्सर यु–१६ एकेडेमी कप क्रिकेट प्रतियोगिताको च्याम्पियन बनेको छ ।

पोखराको एमसीसी मैदानमा शनिबार भएको खेलमा एनसिएसलाई ४१ रनले पराजित गर्दै मकवानपुर क्रिबेट एकेडेमी पहिलो संस्करणको स्पोन्सर यु–१६ क्रिकेट प्रतियोगिताको च्याम्पियन बन्न सफल भएको हो । मकवानपुरले दिएको १ सय ९ रनको लक्ष्य पछ्याएको एनसिएस १५.५ ओभरमा ६७ रनमा समेटियो । एनसिएसका ओपनर विराट भण्डारी र प्रतिश जिसीले समान १७–१७ रन बनाएपनि अन्य ब्याट्सम्यान चल्न नसक्दा एनसिएस पराजित हुन पुग्यो । सचिन शर्माले १४ रन थपेका थिए । एनसिएसलाई सस्तैमा समेट्न मकवानपुरका साकर गजुरेल र शुभ कंशकारले समान तीन–तीन विकेट लिए । यस्तै सरान्स गौतम र राजु यादवले दुई–दुई विकेट लिए ।

यसअघि टस जितेर पहिले ब्याटिङ गरेको मकवानपुरले निर्धारित २० ओभरमा सात विकेट गुमाएर १ सय ८ रनको मध्यम योगफल तयार पारेको थियो । मकवानपुरका लागि शुभ कंशकारले ३१ रन बनाए । सुरज तिमल्सिना २३ रनमा अविजित रहे । सारान्स गौतल १४ रनमा आउट भए । एनसिएसका नितेश यादवले दुई विकेट लिए । शशांक अग्रवाल र रिजन थापाले एक–एक विकेट लिए ।

च्याम्पियन बनेको मकवानपुरले ७५ हजार रुपैया प्राप्त गर्यो । उपविजेता बनेको एनसिएसले ३५ हजार रुपैयामा चित्त बुझायो । मकवानपुरका साकार गजुरेल प्लेयर अफ दि टुर्नामेन्ट घोषित भए । पोखरा क्रिकेट क्लबका मेखबहादुर सेन उत्कृष्ट बलर र एनसिएसका रित गौतम उत्कृष्ट ब्याट्सम्यान घोषित भए ।

विजयी खेलाडीहरुलाई पोखरा वडा नम्वर २ का अध्यक्ष तथा प्रमुख अतिथि शारदा कुमारी पराजुली, देवीवास इभेन्ट्सका प्रवन्ध निर्देशक शैलेन्द्र शर्मा लगायतले पुरस्कृत गरे । खुकुरी इन्टरटेन्टमेन्ट र देवीवास इभेन्ट्सको आयोजना तथा माछापुच्छ्रे क्रिकेट क्लबको संयोजनमा भएको जेठ २७ गतेबाट शुरु भएके प्रतियोगितामा विभिन्न ८ क्रिकेट टिमले सहभागिता जनाएका थिए ।