काठमाडौँ (हाम्रो खेलकुद) – नेपाली राष्ट्रिय क्रिकेट टोलीका सदस्य महबुब आलमले सिंगापुरको सिंगापुर एमर्जीङ स्टार्स क्रिकेट क्लबबाट एससीसी अन्तर्राष्ट्रिय टि२० क्रिकेट प्रतियोगिता खेल्ने भएका छन्।
सिंगापुर क्रिकेट क्लबले आयोजना गर्ने प्रतियोगिता अगष्ट ११ देखि १३सम्म सिंगापुरमा हुँदैछ। महबुब क्लबमा अनुबन्धित हुने पहिलो विदेशी खेलाडी रहेको क्लबले जनाएको छ। प्रतियोगितामा अष्ट्रेलिया, भारत, श्रीलंका, हङ्गकङ्ग, दक्षिण अफ्रीका र सिंगापुरका टोलीहरुको सहभागिता रहनेछ।
३३ वर्षीय महबुबले भर्खरै सम्पन्न प्रधानमन्त्री कपमा हातको चोटका कारण राम्रो प्रदर्शन गर्न सकेका थिएनन्। उनले प्रतियोगिताको पहिलो खेलमा चोट बोकेका थिए। सन् २०००मा जापानविरुद्धको खेलमा डेब्यु गरेका मेहबुबले नेपालको लागि खेल्दै विश्व कीर्तिमान पनि बनाएका छन्। उनले सन् २००८मा मोजाम्बिकविरुद्धको डिभिजन ५को खेलमा विपक्षी टोलीको सबै १० विकेट लिएका थिए।
२ वर्षको अन्तराल पछि केहि महिनाअघि भएको केन्याविरुद्धको खेलबाट राष्ट्रिय टोलीमा फर्किएका आलम मध्यक्रममा विष्फोटक ब्याटिङ गर्छन। बायाँ हाते पेस बलर उनले धनगढी प्रिमियर लिगमा सिवाइसी अत्तरियाबाट खेलेका थिए।
