काठमाडौँ (हाम्रो खेलकुद) – आइसीसी यू१९ विश्वकप छनोट प्रतियोगिता अन्तर्गत टस जितेर फिल्डीङ रोजेको नेपालले सिंगापुरलाई ७३ रनमा अलआउट गरेको छ। कप्तान सन्दिप लामिछानेले उत्कृष्ट बलिङ प्रदर्शन गर्दै २१ खर्चेर ५ विकेट लिए।
फाइल तस्बिर
सिंगापुरका लागि ब्रिगु ऐरले सर्वाधिक ४२ र ओपनर सन अग्रवालले ११ रन बाहेक अन्य कसैले दोहोरो अंकमा रन जोड्न सकेनन्। सिंगापुरका ३ ब्याट्सम्यान खातानखोली पेभेलियन फर्केका थिए। सिंगापुरले ८ रन एक्स्ट्रा मार्फत पाएको थियो।
पहिलो स्पेलमा पेस बलर किशोर महतोले ५ ओभरमा ३ मेडन सहित ६ रन खर्चेर १ विकेट लिएका थिए भने रोहित पौडेलले ५ ओभरमा १ मेडनसहित ८ रनमात्र खर्चेका थिए। ४ रनको स्थितिमा पहिलो विकेट गुमाएको सिंगापुरको दोश्रो विकेटका लागि सन अग्रवाल र युवराज सिंहले ३६ बलसम्म सम्हालिएर खेलेका थिए। बलिङ अट्याकमा स्पिनरहरुको आगमन भएसँगै सिंगापुरको पतन सुरु भएको थियो। तल्लोक्रममा आएका ब्रिगु ऐरले आक्रामक ब्याटिङ गर्दै सिंगापुरको स्कोर उकासेका थिए। एक समय २६/७को स्थितिमा रहेको सिंगापुरलाई ब्रिगुको ६ चौका र १ छक्का सँगै बनाएको ४२ रनले ठुलो राहत दिएको थियो।
नेपाली टोलीका लागि स्पिनर साहब आलमले ३ विकेट लिएका थिए भने किशोर महतोले २ विकेट लिए।
