काठमाडौँ (हाम्रो खेलकुद) – आइसीसी यू१९ विश्वकप छनोट (एसिया क्षेत्र) अन्तर्गत बिहिबार हुने खेलमा नेपाल र अफगानिस्तान भिड्दैछन्। दुवै टोलीले आफ्नो पहिलो दुई खेलमा जित आत्मसात गर्दै अंक तालिकामा समान ४/४ अंक जोडेका छन्। तर अफगानिस्तानको +५.०३५ नेट रन रेटको तुलनामा नेपालको +३.७३९ कम भएकाले अफगानिस्तान शीर्षस्थानमा रहेको छ।
नेपालले आफ्नो पहिलो खेलमा आयोजक टोली सिंगापुरलाई ७३ रनमा अलआउट गर्दै ४ विकेटले खेल जितेको थियो भने दोश्रो खेलमा मलेसियाबाट पाएको ५९ रनको लक्ष्य ५ विकेट गुमाउँदै पुरा गरेको थियो। यता अफगानिस्तानले पहिलो खेलमा मलेसियालाई ८ विकेटले पराजित गरेको थियो भने दोश्रो खेलमा सिंगापुरलाई ७ विकेटले हरायो।
नेपाल र अफगानिस्तान दुवै टोलीका बलरहरु प्रतियोगितामा हावी भएका छन्। नेपालका कप्तान सन्दिप लामिछानेले सुरुवाती २ खेलमा लगातार ५ विकेट लिएर दुवै खेलमा म्यान अफ द म्याचको उपाधि प्राप्त गरे। यता अफगानिस्तानका बलर युसुफ जजाईले पनि २ खेलमा ९ विकेट लिएका छन्। उनले मलेसियाविरुद्धको पहिलो खेलमा ह्याट्रिक पनि लिएका थिए। उनले पनि दुवै खेलमा म्यान अफ द म्याचको उपाधि प्राप्त गरेका थिए।
खेल नेपाली समयानुसार बिहान ७:१५ बजे सुरु हुनेछ।
