काठमाडौं (हाम्रो खेलकुद)– नेपाली राष्ट्रिय टोलीका कप्तान पारस खड्का र मेहबुब आलम सम्मिलित सिंगापुर इमर्जिङ स्टार पाँचौ संस्करणको सिंगापुर अन्तर्राष्ट्रिय टि–ट्वान्टी क्रिकेट प्रतियोगिताको फाइनलमा पराजित भएको छ ।

सिंगापुरस्थित पादाङ क्रिकेट मैदानमा आइतबार भएको खेलमा सिंहालेस क्रिकेट क्लबसँग १० विकेटले पराजित भएपछि नेपाली खलाडी सम्मिलित टोली उप विजेतामा समिति भएको छ । पारस महबुस सम्मिलित सिंगापुर इमिर्जिङ यसअघि समूह चरणको पहिलो खेलमा पनि सिंहालेससँग नै पराजित भएको थियो ।

सिंगापुर इमर्जिङले दिएको १ सय ३१ रनको लक्ष्य सिंहालेसले विना विकेटको क्षति ८.५ ओभरमा पुरा ग¥यो । सिंहालेसका लागि मिनोद बानुका र एमडी सानकाले अविजित इनिङ्स खेले । बानुकाले आक्रमक ब्याटिङ गर्दै २४ बलमा ६ चौका र ४ छक्काको मद्दतमा अविजित ५७ रन बनाए । यस्तै एमडी सानकाले २८ बलमा ८ चौका र ३ छक्काको मद्दतमा अविजित ६७ रन बनाए ।

त्यसअघि पहिले ब्याटिङ गरेको सिंगापुर इमर्जिङले १९ ओभरमा सबै विकेट गुमाएर १ सय ३० रन मात्र बनाउन सक्यो । टोलीका लागि चेतन सूर्यवंशीले सर्वाधिक ४३ रन बनाए । चामिण्डा रुवन र अखिल बालाचन्द्रले समान २२ रन जोडे । मेहबुव १४ रनमा अविजित रहे ।

अन्य ब्याट्सम्यान भने सिंहालेसको कसिलो बलिङसामु निरिह देखियो । सिंहालेसका अख्तर केडर र रमेश मेण्डिसले समान ३–३ विकेट लिए । सेन्नानायकले २ तथा जेफ्रे भानडारसेले एक विकेट लिए ।

त्यसअघि आइतबार भएको खेलमा नेपाली टोलीका कप्तान पारसको अलराउन्डर प्रदर्शन मद्दतमा सिंगापुर इमिर्जिङले मद्रास क्रिकेट क्लबलाई ६ विकेट पराजित गरेको थियो । पारसले ३६ बलमा २० रन बनाउँनुका साथै ४ ओभर बलिङ गरेर १ विकेट लिएका थिए ।

सिंगापुर इमर्जिङले मद्रास क्रिकेट क्लबलाई तथा सिंहालेसले सिड्नी क्रिकेट क्लबलाई हराउँदै फाइनल भेट पक्का गरेका थिए ।