काठमाडौं (हाम्रो खेलकुद) – मलेसियामा अर्को हुने एसीसी यू–१९ एसिया कप छनोटको तयारीमा रहेको नेपाली युवा क्रिकेट टोलीको ब्याटिङ सुधार गर्न ब्याटिङ प्रशिक्षण मोन्टी देशाई नेपाल आइपुगेका छन् ।

त्रिभुवन विमानस्थलबाट बाहिरिदै गरेका मोन्टी देशाईका साथ यू १९ का प्रशिक्षक विनोद दास (बायाँ) ।

गत महिना सिंगापुरमा आयोजना भएको यू–१९ विश्वकप छनोटमा नेपाली टोलीले खराब ब्याटिङ गरेपछि नेपालले ब्याटिङ प्रशिक्षक देशाइलाई बोलाएको हो । सोही निमन्त्रणालाई स्वीकार गर्दै देशाई नेपाली टोलीलाई थप प्रशिक्षण दिन मंगलबार नेपाल आइपुगेका हुन् ।

देशाईले नेपाली टोलीलाई मलेसिया जानु अघिसम्म ब्याटिङ प्रशिक्षण दिने बताइएको छ । देशाईले यसअघि नेपाली राष्ट्रिय टोलीलाई सन् २०१५ मा आयरल्यान्डमा आयोजना भएको टि–ट्वान्टी विश्वकप छनोट र विश्व क्रिकेट लिगअन्तर्गत आयरल्याण्डसँगको खेलअघिसम्म प्रशिक्षण दिएका थिए ।
एसीसी यू–१९ छनोट खेल मलेसियामा आगामी सेप्टेम्बरको ८ देखि १७ तारिखसम्म हुनेछ । छनोटमा नेपाल समूह ‘ए’ मा रहेको छ । नेपालको समूहमा सिंगापुर, थाइल्याण्ड र भुटान रहेको छ ।

त्यस्तै समूह ‘बी’ मा मलेसिया, हङकङ र म्यानमार छन् । । फाइनलमा पुग्ने दुई टोलि एसिया कपको लागि छनोट हुनेछन् । नेपालले छनोटको लागि दिपेन्द्र सिंह ऐरीको कप्तानीमा १४ सदस्यीय नेपाली टोलीको घोषणा आइतबार गरेका थियो ।