गुवाहाटी (एजेन्सी) – भारतविरुद्ध दोस्रो टी-२० खेलमा ८ विकेटको जित निकाल्दै अस्ट्रेलियाले तीन खेलको शृंखला बराबरी गरेको छ । अस्ट्रेलियाको जितमा मोइसेस हेनरीक्वेजले अर्धशतक प्रहार गरे भने जेसन बेरेनड्रोफले ४ विकेट लिए ।
टस जितेर फिल्डिंग रोजेको अस्ट्रेलियाले भारतलाई १ सय १८ रनमा अल आउट गरेको थियो । भारतका शीर्ष क्रमका ब्याट्सम्यान सस्तैमा आउट भएपछि कुलदिप यादभको २७ हार्दिक पान्डेयाको २५ रनको मद्धतले भारतले १ सय १८ रन बनाएको थियो । बेरेनड्रोफले ४ विकेट लिए भने एडम जाम्पाले २ तथा मार्कस स्टोइनिस,एन्ड्रेउ टाइ र नेथन कल्टर नाइलले समान १ विकेट लिए ।
जवाफमा अस्ट्रेलियाले २ विकेट गुमाएर १५.३ ओभरमा लक्ष्य पुरा गर्यो । १३ रनमा दुवै ओपनर गुमाएको अस्ट्रेलियाकालागि हेनरीक्वेज(६२) र ट्राभिस हेड(४८) वीच १ सय ९ रनको साझेदारी रह्यो । भारतका भावानेश्वोर कुमार र जस्प्रित बुम्राहले समान १ विकेट लिए ।
शृंखलाको तेस्रो तथा अन्तिम खेल शुक्रबार हैदराबादमा हुनेछ ।
