विशाखापट्नम (एजेन्सी)– भारतले श्रीलंकाविरुद्धको तीन एक दिवसिय अन्तर्राष्ट्रिय क्रिकेट श्रृंखलाको उपाधि जितेको छ । अन्तिम तथा निर्णायक खेलमा आज श्रीलंकालाई ८ विकेटले हराउँदै भारतले श्रृखंलामाथि कब्जा जमाएको हो । २ सय १६ रनको लक्ष्य पछ्याएको भारतका लागि ओपनर शिखर धवनले अविजित शतकको शानदार इनिङ खेलेपछि जित सहज भएको थियो ।

भारतले १७ भन्दा बढी ओभर बाँकी रहँदा २ विकेटको क्षतिमा २ सय १९ रन बनाउँदै सहजै नतिजा आफ्नो पक्षमा पारेको थियो । अघिल्लो खेलमा दोहोरो शतक बनाएका कार्यवहाक कप्तान रोहित शर्मा (७ रन) सस्तैमा आउट भएपनि शिखरले टोलीको ब्याटिङ मोर्चा सम्हालेका थिए ।

शिखरलाई श्रेयस एयर र दीनेश कार्कीले राम्रो साथ दिएका थिए । श्रेयसले अर्धशतक पुरा गरे । ८५ बल खेलेका शिखले १३ चौका र ६ छक्काको मद्दतमा अविजित सय रन बनाए । श्रेयसले ६३ बलमा ८ चौका र १ छक्काको मद्दतमा ६५ रन बनाए । दीनेश २६ रनमा अविजित रहे । श्रीलंकाका लागि अकिला धनन्जय र थिसारा परेराले समान १ विकेट लिए ।

त्यसअघि भारतले टस जितेर श्रीलंकालाई पहिले ब्याटिङको निमन्त्रणा दिएको थियो । श्रीलंकाले उत्कृष्ट सुरुआत गरेपनि अन्तिमसम्म उच्च प्रदर्शनलाई निरन्तरता दिन सकेन । श्रीलंकाले ४४.५ ओभरमा सबै विकेट गुमाएर २ सय १५ रन जोड्यो । ओपनर उपुल थारगांको अर्धशतक पुरा गरेको खेलमा साडिरा सामाराविक्रमाले ४२, एन्जेलो म्याथुज र एसेला गुनारत्ने समान १७ र दानुस्का गुनातिलाका १३ रन बनाएका थिए ।

अन्य ब्याट्सम्यानले भने दोहोरो अंकमा रन बनाउन सकेनन् । थारगां शतक बनाउन ५ रनले चुकेका थिए । ८२ बल खेल्दै उनले १२ चौका र ३ छक्काको मद्दतमा ८२ रन बनाएका थिए । एक समय २ विकेटको क्षेतिमा १ सय ३६ रन बनाएको श्रीलंकाले बाँकी ८ विकेट गुमाउँदा ७९ रनमात्र जोड्न सक्यो ।
घरेलु टोलीका लागि कुलदीप यादव र युजभेन्द्र चाहालले समान ३, हार्दिक पाण्डेयले २ तथा भूवनेश्वर कुमार र जसप्रित बुम्रराहले समान १ विकेट लिएका थिए । पहिलो खेलमा श्रीलंका विजयी भएपनि दोस्रो खेलमा कार्यवहाक कप्तान रोहित शर्माको कीर्तिमानी दोहोरोका साथ खेल जित्दै खेलमा १–१ को बराबरी गरेको थियो । पहिलो खेल श्रीलंकाले ७ विकेटले र दोस्रो खेल भारतले १ सय ४१ रनले जितेको थियो । एक दिवसिय पछि यी दुई टोलीबीच तीन वटा टि ट्वान्टी खेल हुनेछ । पहिलो टि ट्वान्टी खेल बुधबार हुनेछ ।