काठमाडौं (हाम्रो खेलकुद) – टीभीएस एभरेष्ट प्रिमियर लिग (इपिएल) को पहिलो खेल ललितपुर प्याट्रियट्सले जितेको छ । इपिएल टी–ट्वान्टी क्रिकेटमा आज काठमाडौं किङ्स एलाभेनलाई ७ विकेटले हराउँदै ललिपुरले विजयी सुरुवात गरेको हो । काठमाडौंले दिएको ९० रनको लक्ष्य ललितपुरले १६.३ ओभरमा ३ विकेट गुमाएर पुरा ग¥यो ।

ललितपुरको जितमा भारतीय खेलाडी जयकिसन कोल्सावालाले सर्वाधिक नटआउट ४४ रन बनाए । ४७ बल खेलेका जयकिसनले ४ चौका र २ छक्का प्रहार गरे । राजवीर सिंह १४ रनमा अविजित रहे । जयकिसन र राजवीरले चौथो विकेटका लागि २६ रनको साझेदारी गरे । कप्तान ज्ञानेन्द्र मल्ल २० रनमा आउट भए । ३० बलको सामना गरेका ज्ञानेन्द्रले २ चौका प्रहार गरे । भारतीय योगेश नागर २ रनमा आउट भए ।

ओपनर पवज सर्राफ शुन्य रनमा पहिलो विकेटको रुपमा आउट भएपनि कप्तान ज्ञानेन्द्र र जयकिसान दोस्रो विकेटको लागि ५४ रनको साझेदारी गर्दै टोलीको जितको आधार तयार पारेका थिए । काठमाडौंका लागि श्रीलंकन अक्षु फर्नान्डोले २ र सोमपाल कामीले १ विकेट लिए । त्यसअघि टस हारेर पहिले ब्याटिङ गरेको काठमाडौंले १८.३ ओभरमा सबै विकेट गुमाएर ८९ रनमात्र बनाएको थियो ।

काठमाडौको दोस्रो ओभरमा नै विकेट गएको थियो । ७ रन बनाएको अवस्थामा पहिलो विकेटको रुपमा सागर पुनलाई गुमाएको काठमाडौंले तेस्रो ओभरमा नरेश बुढाएरलाई शुन्य रनमा गुमाएको थियो । २३ रन जोडेको अवस्थामा काठमाडौले आफ्नो महत्वपूर्ण विकेट गुमायो । कप्तान महरुफ परवेजलाई काठमाडौंले ७ रनमा गुमायो । ९ बलको सामना गरेका महरुफले १ छक्का प्रहार गरे । महरुफ मेहबुब आलमको बलमा पवनबाट क्याच आउट भए ।

काठमाडौंका लागि अमित श्रेष्ठले सर्वाधिक २७ रन बनाए । २८ बलको सामना गरेका अमितले ४ चौका प्रहार गरे । श्रीलंकन अक्षु १५ रनमा आउट भए । सोमपाल १४ रनमा रनमा आउट बनाए । कप्तान महरुफ र सुवोध कुमारले समान ७ रन बनाए । सोमपाल र अक्षुले सातौ विकेटको लागि ४० रनको साझेदारी गर्दै इनिङ्स उकासेपनि उनीहरुको साझेदारी तोडिएपछि काठमाडौं निरिह बन्यो ।

त्यसपछि ब्याटिङमा आएका सिद्धान्त लोहनीले ५ रन बनाए । ओपनर सागर पुन समान ४ रनमा आउट भए । नरेश बुढाएर, राजु रिजाल र जितेन्द्र मुखिया शुन्य रनमा आउट भए ।ललितपुरका लागि सुवोध भाटीले सर्वाधिक ४ विकेट लिए । भाटीले ३.३ बलमा १५ रन खर्चदै ४ विकेट लिए । यस्तै ललित नारायण राजवंशीले ४ ओभरमा १४ रन खर्चदै ३ विकेट लिए । मेहबुव आलमले २ विकेट लिदा योगेश नागरले १ विकेट लिए । ललितपुरका ललित नारायण म्यान अफ दी म्याच घोषित भएर उनले १० हजार रुपैयाँ प्राप्त गरे ।

प्रतियोगिता अन्र्तगत मंगलबार दुई खेल हुनेछ पहिलो खेलमा चितवन टाइगर्सले र पोखरा राइनोजसँग प्रतिस्पर्धा गर्दा विराटनगर वारियर्सले ललितपुर प्याट्रियट्ससँग खेल्नेछ । पुस १५ गते सम्म चल्ने एपिएलको विजेताले उपाधिसहित २१ लाख रुपैयाँ प्राप्त गर्नेछ ।