काठमाडौं (हाम्रो खेलकुद) – राष्ट्रिय टोलीका कप्तान समेत रहेका पारस खड्काको नेतृत्वमा रहेको विराटनगर वारियर्सले टीभिएस एभरेष्ट प्रिमियर लिग (इपिएल) टी–ट्वान्टी क्रिकेट प्रतियोगितामा विजयी सुरुवा तगरेको छ । त्रिवि क्रिकेट मैदान कीर्तिपुरमा सोमबार भएको खेलमा विराटनगरले राष्ट्रिय टोलीका उपकप्तान ज्ञानेन्द्रले नेतृत्व गरेको ललितपुर प्याट्रियट्सलाई ६ रनले हराएको हो ।

तस्बिरहरु : विवेक सुवेदी/ हाम्रो खेलकुद

ललितपुरको यो पहिलो हार हो । यसअघि सोमबार भएको पहिलो खेलमा ललितपुरले काठमाडौं किङ्स इलाभेनलाई ७ विकेटले पराजित गरेको थियो । विराटनगरले दिएको १ सय ५१ रनको लक्ष्य पछ्याएको ललितपुर पुरै ओभर खेल्दै ४ विकेट गुमाएर १ सय ४४ रनमात्र बनाउन सक्यो । ललितपुरका लागि पवन सर्राफले अर्धशतक बनाए । तर, टोलीले सफलता प्राप्त गर्ने सकेन ।

४५ बल खेलेका पवन ६ चौका र १ छक्कासहित ५१ रन बनाए । योगेश नागर २७ रनमा आउट भए । पवन र योगेशले तेस्रो विकेटको लागि ७५ रनको साझेदारी गर्दै इनिङ्स उकासेका थिए । कुशल भुर्तेल २० रनमा अविजित रहे । जयकिसन कोल्सावाला १२ रनमा आउट भए ।

जयकिसन करण केसीको बलमा अन्सुमन रथबाट क्याच आउट भए । मेहबुब आलम १३ रनमा अविजित रहे । कप्तान ज्ञानेन्द्र १ रनमा वसन्त रेग्मीको बलमा अनिल कुमार शाहबाट क्याच आउट भए । विराटनगरका कप्तान पारस, अन्सुमान रथ, करण केसी र वसन्त रेग्मीले समान १ विकेट लिए ।

त्यसअघि टस हारेर पहिले ब्याटिङको निम्तो पाएको विराटनगरले २० ओभरमा ६ विकेट गुमाएर १ सय ५० रनको योगफल तयार पारेको थियो । टोलीका लागि अनिलले अविजित सर्वाीधक ४७ रनको बनाए । ३५ बल खेलेका अनिलले २ चौका र ३ छक्का प्रहार गरे । पारसले ३८ रन जोडे ।

हङकङका बबर हायातले ३४ रन बनाए । उनले २५ बलमा ५ चौका र १ छक्का प्रहार गरे । उनी सन्दिप लामिछानेको बलमा एलबिडब्लुको शिकार भए । बबर र अनिलले चौथो विकेटको लागि ७१ रनको साझेदारी गर्दै इनिङ उकासेका थिए । अन्सुमान रथ १४ रनमा सन्दिपको बलमा कुशल भुर्तेलबाट क्याच आउट भए ।

विराटनगरका ओपनर आशिफ शेख ४ रनमा आउट भए । ललितपुरका सन्दिपले २ तथा सुवोध कुमार भाटी र योगेश नागरले समान १ विकेट लिए । प्रतियोगिता अन्र्तगत बुधबार पनि दुई खेल हुनेछन् । पहिलो खेलमा विराटनगर र पोखरा राइनोज तथा दोस्रो खेल भैरहवा ग्ल्याडियटर्स र काठमाडौं किङ्स इलाभेनबीच हुनेछ ।