विनोदबाबु रिजाल
चितवन– इन्डियन प्रिमियर लिग (आईपीएल) टोली दिल्ली डेयर डेभिल्र्समा अनुबन्ध भएका नेपाली युवा क्रिकेटर सन्दीप लामिछानेलाई चितवन जिल्ला क्रिकेट संघले भरतपुरमा सम्मान गरेको छ । बुधबार आयोजित कार्यक्रममा संघले सन्दीपसँगै चितवन क्रिकेट एकेडेमीका उनका प्रशिक्षक राजु खड्कालाई पनि सम्मान गरेको हो ।
सो अवसरमा लामिछानेलाई नगद २० हजार र खड्कालाई १० हजारसहित प्रमाणपत्रले सम्मान गरियो । सम्मान ग्रहणपछि सम्बोधन गर्दै सन्दीपले आफू यो स्थानसम्म पुग्न धेरै अग्रजको योगदान रहेको बताए । उनले त्यसमा पनि प्रशिक्षक खड्काको भूमिका मुख्य रहेको बताए । उनले आफ्ना प्रशिक्षक संगै सम्मानित हुन पाएकोमा निकै खुसी लागेको बताए ।
यस्तै प्रशिक्षक खड्काले सन्दीप मेहनती, लगनशील र अनुशासित भएका कारण यो स्थानसम्म पुग्न सफल भएको बताए । चितवनले सन्दीपजस्ता थुप्रै खेलाडी जन्माउन सक्ने भन्दै उनले त्यसका लागि खेलमैदान र स्रोतसाधन अभाव रहेको बताए । चितवन क्रिकेट संघका प्रवक्ता अनिल अधिकारीले भएका क्रिकेट मैदानसमेत खनजोत हुन थालेपछि खेल मैदानको अभाव हुन थालेको बताए । उनले देश चिनाउने खेलाडी उत्पादन गर्न खेल मैदानको जरुरत पर्ने बताए ।
