धनगढी (हाम्रो खेलकुद) – ब्याटिङमा सुवोध भाटी र बलिङमा सन्नी पटेलले उत्कृष्ट प्रदर्शन गरेपछि काठमाडौं गोल्डेन्स धनगढीमा जारी रुस्लान धनगढी प्रिमियर लिग (डिपिएल)– २ को फाइनलमा प्रवेश गरेको छ । काठमाडौं गोल्डेन्सले महेन्द्रनगर युनाइटेडलाई ५ विकेटले पराजित गर्दै प्रतियोगिताको फाइनलमा प्रवेश गरेको हो । ६ विकेट लिएका सन्नी पटेल म्यान अफ द म्याच घोषित भए ।
अब काठमाडौंले उपाधिका लागि टिम चौराहा धनगढीसँग उपाधिका लागि खेल्नेछ । धनगढीले काठमाडौंलाई नै पराजित गर्दै फाइनलमा स्थान बनाएको थियो । फाइनल शुक्रबार हुनेछ । महेन्द्रनगरले दिएको १ सय ४३ रनको लक्ष्य पछ्याएको काठमाडौंले निर्धारित लक्ष्य १८ ओभर २ बलमा ५ विकेट गुमाएर लक्ष्य पूरा गर्यो । काठमाडौंका लागि सुवोध भाटीले उत्कृष्ट ब्याटिङ गरे । भाटी ५२ रनमा आउट भए । २९ बल खेलेका भाटीले ५ छक्का र ४ चौका प्रहार गरे ।
यस्तै भाटी प्रतियोगितामा सबैभन्दा छिटो अर्धशतक बनाउने खेलाडी बने । भाटीले १७ बलमा ५२ रन बनाउदै प्रतियोगितामा सबैभन्दा छिटो अर्धशतक पूरा गर्ने पहिलो खेलाडी बनेका हुन् । यो भन्दा अघि विराटनगर किङ्सका बाबर हायतले रुपन्देही च्यालेन्जर्सविरुद्ध २८ बलमा ५३ रन बनाउदै छिटो अर्धशतक पूरा गरेका थिए । कप्तान ज्ञानेन्द्र मल्ल २५ रनमा आउट भए । यस्तै काठमाडौंका अमित श्रेष्ठ २६ रनमा आउट भए । भुपेन्द्र थापा १५ रनमा आउट भए । पुष्प थापा ९ रनमा आउट हुन पुगे । नरेश बुढाऐर ७ तथा सन्नी पटेल ५ रनमा नटआउट रहे ।
महेन्द्रनगरका पुनित मेहराले २ तथा भुवन कार्की, रोविन क्षेत्री र पुनित विष्टले समान १ विकेट लिए । यसअघि संघीय प्रहरी इकाई कार्यालयको खेल मैदानमा बिहिबार टस हारेर पलिे ब्याटिङको निम्तो पाएको महेन्द्रनगरले २० ओभरमा ९ विकेट गुमाएर १ सय ४२ रनको मध्यम योगफल तयार पार्यो । खराव शुरुवात गरेको महेन्द्रनगर युनाइटेडले १० रन जोड्दा महत्वपूर्ण ६ विकेट गुमाएको थियो । तर, क्रिजमा रहेका पुनित मेहरा र आसिफ शेखले सातौ विकेटको लागि ८५ रनको साझेदारी गर्दै टिमको इनिङ्स उकासेका थिए ।
महेन्द्रनगरका विनोद भण्डारी, आसिफ शेख, हरिशंकर शाह, रोहित कुमार पौडेल र भुवन कार्कीले रनको खात नै खोल्न सकेनन् । पुनित विष्ट ७ रनमा आउट भए । आसिफ शेख ४३ रनमा आउट भए । ३९ बल खेलेका आसिफले १ छक्का र ४ चौका प्रहार गरे । पुनित मेहरा ५८ रनमा आउट रहे । ४२ बल खेलेका पुनितले ४ छक्का र ४ छक्का प्रहार गरे । १२ बलमा करण २ छक्काको मद्दतमा २१ रन बनाएर आउट भए ।
बलिङमा उत्कृष्ट प्रदर्शन गरेको काठमाडौंका सन्नी पटेल एक्लैले ६ विकेट लिए । आफ्नो स्पेलको ४ ओभरमा सन्नीले उत्कृष्ट बलिङको नमुना पेश गर्दै महेन्द्रनगरको महत्वपूर्ण ६ विकेट लिन सफल भएका हुन् । सन्नीले ४ ओभरमा १० रन खर्चदै १ मेडनसहित महेन्द्रनगरको महत्वपूर्ण ६ विकेट लिन सफल भएका हुन् । पहिलो ओभरको दोस्रो बलमै ओपनर ब्याट्सम्यान विनोद भण्डारीलाई एलबिडब्लुको शिकार बनाएका थिए । तेस्रो ओभरको पहिलो बलमा आसिफ शेख र अन्तिम बलमा हरिशंकर शाहलाई आउट गरेका थिए ।
सन्नीले पाँचौ ओभरको तेस्रो बलमा पुनित विष्ट, पाँचौ ओभरमा रोहित कुमार पौडेल र अन्तिम बलमा भुवन कार्कीलाई आउट गरेका थिए । पटेल ७ खेलबाट १२ विकेट लिएर सर्वाधिक विकेट लिनेको शीर्षस्थानमा रहेका छन् । पुष्प थापा र सुवोध भाटीले १ विकेट लिए ।
