कोहलपुर, माघ १७ । रोयल स्पोर्ट्स क्लब नेपालगञ्ज सगरमाथा सिमेन्ट लायन्स कोहलपुर सिटी कप टि–२० प्रतियोगिताको च्याम्पियन बनेको छ ।
आइतबार भएको फाइनल खेलमा कोहलपुर युथ क्लबलाई २७ रनले पराजित गर्दै रोयल च्याम्पियन बनेको हो । रोयलले दिएको १३६ रनको लक्ष्य पछ्याएको कोहलपुर १९.२ ओभरमा अलआउट हुदै १०९ रनमै समेटियो । १५औँ ओभरमा पाँच विकेट गुमाएर ९७ रन बनाएको स्थितिमा कप्तान अन्तिम थापा रनआउट भएपछि कोहलपुरले बाँकी १२ रन जोड्दा सबै विकेट गुमाएको थियो । कोहलपुरका लागि अन्तिम थापाले सर्बाधिक २८ रनको योगदान दिए । सबिन शाक्यले १९ र असिफ हुसेनले १४ रन बाहेक अन्य ब्याट्सम्यानले दोहोरो अंकमा रन बनाउन सकेनन् । रोयल स्पोर्ट्सको लागि राष्ट्रिय खेलाडी समेत रहेका बसन्त रेग्मीले एक्लैले चार विकेट तथा बिपिन चन्द्रले दुई विकेट हात पारे ।
यसअघि टस हारेर पहिले ब्याटिङ गरेको रोयलले निर्धारित २० ओभरमा सात विकेट गुमाई १३५ रनको मध्यम स्कोर बनायो । रोयल स्पोर्ट्सका लागि ओपनर ब्याट्सम्यान सुबेन्दु पाण्डे र अफाक शेखले पहिलो विकेटको लागि ५६ रनको साझेदारी गर्दै राम्रो सुरुवात दिलाए । अफाक शेखले २४ रन तथा र सुबेन्दु पाण्डेले ३८ रन बनाई आउट भए । त्यसपछि ब्याटिङमा आएका बिपिन चन्द्राले चार चौका र दुई छक्का मद्दतमा ३६ रन बनाउदै रोयलको इनिङ उकासेका थिए । रोयल ब्याट्सम्यान मोहित सिंहले १४, सितांशु पाण्डेले ११, बसन्त रेग्मीले तीन तथा आकास बिष्टले तीन रनको योगदान दिए ।
कोहलपुर युथका बलर दिपेन्द्र यादब र असिफ हुसेनले समान दुई विकेट हात पारे । यस्तै लाल बहादुर अधिकारी र मायाँक यादबले समान १ विकेट आफ्नो नाममा लेखाए । फाइनल खेलको म्यान अफ द म्याच बसन्त रेग्मी घोषित भए ।
जितसँगै रोयल स्पोर्ट्स क्लबले नगद रु १ लाख प्राप्त गरेको छ । उपविजेता टोलि कोहलपुर युथ क्लबले ५० हजार रुपैयामा चित्त बुझायो । प्रतियोगिताको उत्कृष्ट खेलाडी घोषित भएका रोयल स्पोर्ट्स क्लबका शुबेन्दु पाण्डेले जनही तीन हजार रुपैया प्राप्त गरे । यस्तै प्रतियोगिताको उत्कृष्ट बलर बालुवाटार क्रिकेट क्लबका विजय गौतम र बेस्ट ब्याट्सम्यान होलिल्याण्ड उच्च माविका शाहिद अन्सारी घोषित भए । उनीअरुले जनही समान दुई हजार प्राप्त गरे । विजेता टोलीलाई सभासद देबराज भार, पिडिजी एमजेएफ लायन्स श्याम शाक्यले पुरस्कार प्रदान गरेका थिए ।
माघ ७ गते देखि सुरु भएको प्रतियोगितामा १६ टोलीको सहभागिता थियो ।
