काठमाडौं, २० माघ । नेपाली यू-१९ क्रिकेट टीममा कप्तान राजु रिजाललाई अन्तराष्ट्रिय क्रिकेट काउन्सिल आईसीसीले क्लिन चिट दिएको छ ।
राजु ओभर एजको भएको कुनै प्रमाण नभएको भन्दै आईसीसीले नेपालले राजुकै कप्तानीमा विश्वकपका बाँकी खेल सक्ने बताएको छ ।
बंगलादेशमा जारी विश्वकपको समूह चरणको अन्तिम खेलमा नेपाल र भारतको खेलपछि २५ वर्षका मुम्बईका क्रिकेटर कौस्तुभ पावरले नेपाली कप्तान राजु ओभर एजको भएको दाबी गरेका थिए, जसलाई भारतीय सञ्चार माध्यममा छाएको थियो । पावरको दाबी थियो कि राजु यू-१५ मा मुम्बईबाट आफूसँग राजु शर्माको नामबाट खेलेका थिए । राजु २४/२५ वर्षको भएको उनको दाबी थियो ।
यसबारे आईसीसीले औपचारिक प्रतिक्रिया दिएको छ । नेपाल क्रिकेट संघ क्यानले प्रतियोगिता अघि नै पेश गरेको राजुको डकुमेन्टमा उनी १९ वर्षभन्दा बढी भएको कुनै संकेत नदेखिएको आईसीसीले जनाएको छ ।
आईसीसीले भने आफूले नेपाल क्रिकेट संघ, कप्तान रिजाल र नेपाली टीम म्यानेजर सुदिप शर्मासँग कुरा गरेको बताएको छ ।नयाँ सूचना नआउँदासम्म आईसीसीले यसबारे नयाँ कुनै निर्णय नलिने र यो विषयको बहस बन्द गरेको छ ।
