काठमाडौं (हाम्रो खेलकुद) – सैनिक आवासीय विद्यालय र नेक्सस क्रिकेट एकेडेमी कागेश्वरी मनोहरा यु–१६ टि–२० सान क्रिकेट कपको सेमिफाइनलमा प्रवेश गरेको छ ।

सैनिक र नेक्सस सेमिफाइनलमा प्रवेश गरेसँगै प्रतियोगिताको सेमिफाइनल समिकरण पुरा भएको छ । यसअघ ओएसिस र ग्रेट हिमालयले अन्तिम चारमा स्थान बनाइसकेका थिए । त्रिवि क्रिकेट मैदानमा बिहिबार भएको पहिलो क्वाटरफाईनल खेलमा सैनिक आवसीय विद्यालयले एन्जल्स एकेडेमीमाथि १ सय ४ रनको फराकिलो जित निकाल्यो ।

सैनिकले दिएको १ सय ३९ रनको लक्ष्य पछ्याएको एन्जल्स ३४ रनमा अलआउट भयो । एन्जल्सका लागि विक्रम थापाले१२ रन जोड्नुबाहेक अन्यले दोहोरो अंक छोएनन् । एन्जल्सको ब्याटिङ ध्वस्त पार्ने क्रममा सैनिकका सृजन गुरुङले ४ ओभरमा एक मेडनसहित ९ रन खर्चेर ४ विकेट लिए । कृष कार्कीले दुई तथा अशिम कार्की र क्षितिज जंग शाही समान १ विकेट लिए ।

यसअघि टस हारेर पहिले ब्याटिङको निम्तो पाएको सैनिकलले २० ओभरमा ७ विकेटको क्षतिमा १ सय ३८ रन जोडेको थियो । सैनिकका लागि कप्तान जवाफ जंग मल्लले सर्वाधिक ४७ रन जोडे । यस्तै क्रिस कार्कीले २१ रन, सृजन गुरुङले १६ रन, अर्जुन तामाङले १३ रन र निश्चल तामाङले १२ रन जोडे । एन्जल्सका योगेश रावल र किशोर बोगटीले समान २ विकेट लिए । विनय घर्तीमगरले एक विकेट लिए ।

बिहिबारै भएको अर्काे खेलमा नेक्सस क्रिकेट एकेडेमीले बालुवाटार क्रिकेट एकेडेमी माथि ८८ रनको जित निकाल्यो । टस जितेर ब्याटिङ गरेको नेक्ससले ६ विकेटको क्षतीमा १ सय ३३ रन जोड्यो । नेक्ससका लागि प्रियान्सु श्रेष्ठले ४३ रन जोडे । यस्तै बिपिन शाहीले ३४ रन, तृतराज दासले १५ रन र अदित सुवेदीले १२ रन जोडे ।

ग्रेट हिमालयका विरोन जोशी र प्रतिक पण्डितले समान २ विकेट लिदा सागर थापा र सदित्य बञ्जाराले समान १ विकेट लिए । प्रतिउत्तरमा बालुवाटारले १९ ओभर ४ ओभरमा अल आउट हुँदै ४५ रन मात्र जोड्न सक्यो । नविन तामाङले १२ रन जोड्नुबाहेक कुनैपनि खेलाडीले दोहोरो अंक जोड्न सकेनन् । नेक्ससका तृतराज जोशीले ३ विकेट लिए । उनी म्यान अफ दि म्याच घोषित भए । सुमन सुन्दर र बिपिन शाहीले समान २ विकेट लिए । रिकेश ओझा र आविष्कार जोशी समान १ विकेट लिए ।

प्रतियोगिताको सेमिफाईनल भोली शुक्रबार ८ बजेबाट किर्तिपूर क्रिकेट मैदानमा सुरु हुने कार्यक्रम रहेको छ ।