काठमाडौं, माघ २८
बंगलादेशमा जारी आइसीसी यु–१९ विश्वकप अन्र्तगत प्लेअफको तेस्रो स्थानको लागि भएको खेलमा नेपाल नामिवियासँग पराजित भएको छ ।

बिहिबार भएको खेलमा नेपाल नामिवियासँग १५ रनको झिनो पराजित भएको हो । हारसँगै नेपालको अब विश्वकपमा सोझै छनोट हुने सम्भावना पनि सकिएको छ ।

नामिवियाले दिएको २२६ रनको लक्ष्य पछ्याएको नेपाल निर्धारित ४५ ओभरको खेलमा ४४.२ बलमा सबै विकेट गुमाएर २१० रनमा समेटियो । नेपालका लागि सुनिल धमलाले ५९ रनको योगदान दिएपनि त्यो जितको लागि पर्याप्त भएन । यस्तै योगेनद्र सिंह कार्कीले ३५ रन तथा प्रेम तामाङले ३२ रनको योगदान दिएका थिए । दिपेन्द्र सिंह ऐरीले ३१ तथा आरिफ सेखले ३० रन बनाउनु बाहेक अन्य ब्याट्सम्यानले राम्रो प्रदर्शन गर्न सकेन । नामिवियाका फिटरिज कोटजी एक्लैले तीन विकेट हात पारे । यस्तै बर्टन ज्याकोवले दुई विकेट लिए ।

यसअघि नामिवियाले निर्धारित ४५ ओभरको खेलमा नौ विकेट गुमाएर २२५ रनको योगफल तयार पारेको थियो ।
उसका लागि लोहन लोरेन्सले सर्वाधिक ५९ रनको योगदान दिएका थिए । नेपालका सन्दिप लामिछानेले तीन तथा सुशिल कडेलले तीन विकेट लिएका थिए ।