एजेन्सी – भारतीय क्रिकेट टोलीका ओपनर तथा विश्फोटक ब्याटम्यान रोहित शर्माले क्रिकेटका भगवान भनेर चिनिने भारतका पुर्व कप्तान सचिन तेन्दुलकरको अर्को रेकर्ड तोडेका छन् ।

भारत र वेस्ट इन्डिजबीचको चौथो वान डे खेलमा १ सय ६२ रन बनाएका रोहितले २० चौका र ४ छक्का प्रहार गरेका थिए । रोहितले आजको खेल प्रहार गरेका सुरुवाती दुई छक्काले सचिनको रेकर्ड तोडेका हुन् । सचिनले वान डे खेलमा कुल १ सय ९५ छक्का प्रहार गरेका छन् । तर रोहितले आज ४ छक्का प्रहार गर्दै आफ्नो वान डे करियर १ सय ९८ छक्का पुर्याएका छन् । सचिनको १ सय ९५ छक्काको रेकर्ड तोड्दै भारतीय वान डे क्रिकेटमा सर्वाधिक छक्का प्रहार गर्ने दोस्रो खेलाडी बन्न पुगेका छन् ।

यसअघि रोहितले पहिलो खेलमा १ सय ५२ रन प्रहार गर्दै सर्वाधिक पटक १ सय ५० रन कटाउने भारतीय खेलाडी सचिनको रेकर्ड तोडेका थिए । भारतीय ब्याटम्यानमा वान डे खेलमा सर्वाधिक छक्का प्रहार गर्ने सूचिमा महेन्द्र सिंह धोनीको नाम शिर्ष स्थानमा रहेको छ । धोनीले हाल सम्म २ सय १८ छक्का प्रहार गरि सकेका छन् ।

त्यस्तै अम्बाती रायडुले पनि शतक प्रहार गरेपछि भारतले वेस्ट इन्डिजलाई ३ सय ७८ रनको विशाल लक्ष्य दिएको छ । भारतले निर्धारित ५० ओभरमा ५ विकेट गुमाउदै ३ सय ७७ रन बनाएको हो । पाँच वान डे क्रिकेट श्रृंखला १– १ बराबरीमा रहेको छ ।