काठमाडौं (हाम्रो खेलकुद) – अन्तर्राष्ट्रिय क्रिकेटमा पाइला टेकेको १२ वर्ष पुग्दासम्म नेपाली राष्ट्रिय महिला क्रिकेट टोलीले अहिले सम्म सिनियर स्तरमा अन्तर्राष्ट्रिय उपाधि जित्नसकेको छैन । सन् २००७ मा नेपालले पहिलो पटक अन्तर्राष्ट्रिय प्रतियोगिता खेलेको थियो । दशक भन्दा लामो यात्रा तय गरेको नेपाली महिला टोली यसपटक उपाधिको निकट पुगेको छ ।
थाइल्याण्डमा जारी महिला टि ट्वान्टी स्मास क्रिकेट प्रतियोगिता नेपाली टोली ऐतिहासिक उपाधि नजिक पुगेको हो । जारी प्रतियोगितामा नेपाली टोलीले उच्च प्रदर्शन गरेको छ । समूह चरणका ४ खेलमा अपराजित रहेको नेपाली टोलीले सेमिफाइनलमा इन्डोनेसियालाई सहजै हराएको थियो ।
नेपालले उपाधिको लागि शनिबार घरेलु टोली थाइल्यान्डको सामना गर्ने छ । थाइल्यान्डलाई पाखा लगाउन सके अन्तर्राष्ट्रिय क्रिकेटमा पाइला टेकेको १२ वर्षपछि नेपालले उपाधि जित्नेछ । यहि सपनाका साथ नेपाली टोली शनिबार तेर्थई क्रिकेट मैदान उत्रने छ ।
शुक्रबार नेपालले इन्डोनेसियालाई ९२ रनको फराकिलो अन्तरले पराजित गर्दै अन्तिम दुईको यात्रा तय गरेको थियो । थाइल्यान्डले यूएईलाई ४९ रनले हराउदै नेपालसँगको भेट पक्का गरेको थियो ।
