काठमाडौं (हाम्रो खेलकुद)– थाइल्याण्डमा जारी महिला टि ट्वान्टी स्मास क्रिकेट प्रतियोगिताको फाइनल खेलमा घरेलु टोली थाइल्यान्डले नेपाललाई १ सय २२ रनको लक्ष्य दिएको छ ।
शनिबार तेर्थई क्रिकेट मैदान टस हारेर पहिला ब्याटिङ थालेको थाईल्यान्डले निर्धारित २० ओभरमा १ विकेटको क्षतिमा १ सय २१ रन बनायो । ओपनर नात्थकन चान्थम र नरुइमोल चवाईले पहिलो विकेटका लागि १७ ओभर भित्र ९४ रनको साझेदारी गरेपछि थाइल्यान्डले बलियो योगफल तयार पारेको हो ।
बलियो स्थितीमा पुर्याउन उत्कृष्ट अर्धशतक प्रहार गरेकी चान्थमले ६७ बलमा ४ चौका प्रहार गर्दै ६९ रनमा नट आउट रहिन् । त्यस्तै चवाईले ४२ बलमा २७ रन जोडिन् । चवाईलाई कप्तान रुविना क्षेत्रीले रन आउट गरेकी थिन् । चानिदा सुथिरन्गु १९ रनमा नट आउट रहिन् । नेपालले ७ जना बलर प्रयोग गरेपनि कुनैपनि बलरले विकेट लिन सकेनन् । एक मात्र विकेट रन आउटको रुपमा पाएको थियो ।
थाइल्यान्डले प्रस्तुत गरेको लक्ष्य नेपालले पक्ष्याउन सके पहिलो पटक सिनियर महिला टिमले अन्तर्राष्ट्रिय उपाधि हात पार्ने छ । शुक्रबार नेपालले इन्डोनेसियालाई ९२ तथा थाइल्यान्डले यूएईलाई ४९ रनले हराउदै फाइनल यात्रा पक्का गरेका थिए ।
