काठमाडौं (हाम्रो खेलकुद) – नेपाली महिला क्रिकेट टोलीमा धेरै सुधार गर्नुपर्ने टोलीका प्रशिक्षक विनोद दासले बताएका छन् ।

थाइल्यान्डमा शनिबार सम्पन्न टि ट्वान्टी स्मास प्रतियोगिताको फाइनलमा पराजित भएर आइतबार स्वदेश फर्केपछि नेपाली टोलीका पूर्व कप्तान समेत रहेका दासले महिला टोलीमा व्यापक सुधार गर्नुपर्ने बताएका हुन् ।

समूह चरणका सबै चार खेल जितेको नेपाली टोलीले सेमिफाइनलमा इन्डोनेसियालाई सहजै हराएको थियो । तर, फाइनलमा भने नेपाली टोली थाइल्याथन्डसँग ७० रनले पराजित भएको थियो । १ सय २२ रनको लक्ष्य पछ्याएको नेपाली टोलीले १७.२ ओभरमा सबै विकेट गुमाएर मात्र ५१ रन जोड्न सक्यो ।

‘मैले एक महिना अघिबाट महिला टोली हेर्ने मौका पाएको थिए । टिममा केही परिवर्तन गर्न सके हुला । तर, सुधार गर्नुपर्ने ठाउ धेरै छ । यही प्रतियोगिताबाट हामीले हाम्रो स्तर पत्ता लगाएका छौं,’ उनले भने, ‘लामो समयपछि मैदान फर्किएको खेलाडीहले आफ्नो ठाउबाट सक्दो खेलेका हुन् । खेलाडीहरुको यत्तिको प्रदर्शनबाट म सन्तुष्ट छु । कमजोरी सुधार गर्नु नै हाम्रो लक्ष्य हो ।’

प्रशिक्षक दासले एक महिनापछि हुने विश्वकप छनोटमा यही कमजोरीलाई सुधार गर्दै तयारी थाल्ने बताए । ‘टी–टवान्टी स्मास हाम्रो कमजोरी पत्ता लगाउने मौका दिएको छ । विश्वकप छनोटको एक महिना समय बाँकी छ । यस बीचमा हामी हाम्रो कमजोरी सुधार गर्दै प्रशिक्षण थाल्नेछौं । कमजोरी सुधार्नु नै हाम्रो लक्ष्य हुनेछ । कमजोरी सुधार गरेर विश्पकप छनोट प्रतियोगिता खेल्नेछौं ।’