सुबास हुमागाईं, दुवई

नेपाली राष्ट्रिय क्रिकेट टोलीले यूएईविरुद्ध एकदिवसीय अन्तर्राष्ट्रिय सिरिजको पहिलो खेलमा विष्फोटक ब्याट्सम्यान विनोद भण्डारी, स्पिनर ललित नारायण राजवंशी र अलराउण्डर पवन सर्राफलाई ओडीआई डेब्यु दिने भएको छ । विनोदले टोलीमा विकेटकिपरको भूमिका पनि निर्वाह गर्नेछन् । यूएई टस जितेर फिल्डिङ गर्दैछ ‌।

यसअघी नेपालले खेलेको तीन ओडीआई खेलमध्ये दुई खेलमा सुवास खकुरेल र एकमा अनिल साहले सो जिम्मेवारी वहन गरेका थिए । यी दुवै खेलाडी यसपटक सिरिजको लागि घोषित प्रारम्भिक टोलीमा अटाएनन् । विनोदले ज्ञानेन्द्र मल्लसँग मिलेर नेपालको लागि ओपनिङ गर्नेछन् ।

यस्तै युवा अलराउण्डर पवन सर्राफ र स्पिनर ललित नारायण राजवंशीले पनि डेब्यु गर्ने भएका छन् । उमेर समूहको राष्ट्रिय टोलीमा प्रभावशाली प्रदर्शन गर्दै अाएका पवन र ललित पछिल्लो समय घरेलु प्रतियोगितामा पनि लयमा रहेका थिए ।

यूएईविरुद्ध पहिलो ओडीआईको लागि नेपाली टोली :
पारस खड्का (कप्तान), ज्ञानेन्द्र मल्ल (उपकप्तान), सन्दीप लामिछाने, सोमपाल कामी, दीपेन्द्रसिंह ऐरी, करण केसी, विनोद भण्डारी, ललित नारायण राजवंशी, आरिफ शेख, पवन सर्राफ, वसन्त रेग्मी