काठमाडौं
यसै बर्ष यू १९ विश्वकप क्रिकेट खेलका राजु रिजाल र स्पिनर सन्दिप लामिछानेले शनिबार विश्व क्रिकेट लिग च्याम्पियनसिपअन्तर्गत नामिबियासँग खेल्दै राष्ट्रिय टोलीबाट डेब्यू गरेका छन् । नियमित विकेट किपर सुवास खकुरेल चोटग्रस्त भएपछि त्यो भूमिका समेत पाएका राजुको पहिलो खेल सन्तोषजनक रहन सकेन ।
सन्दीपको प्रदर्शन भने प्रशंसायोग्य रह्यो । १० ओभर बलिङ गरेका सन्दीपले २ ओभर मेडनका साथ ३७ रन दिएर १ विकेट लिए । यू–१९ विश्वकपमा ह्याट्रिक सहित १४ विकेट लिएर उनी चर्चामा आएका थिए । सन्दीपको प्रदर्शनबाट कप्तान पारस खड्का सन्तुष्ट देखिए । ‘ सिनियरको भन्दा उनको बलिङ कमजोर थिएन, पारसले भने,‘आशा गरौं भविष्यमा अझै राम्रो गर्न सक्छन् ।’
पहिलो पटक सिनियर टोलीको मुख्य प्रशिक्षक बनेका जगत टमाटाले राजुले पहिलो खेलमा सोचे अनुरुप प्रदर्शन गर्न नसकेपनि विस्तारै निखारिदै जानेमा विश्वास व्यक्त गरे । उनले भने ‘यत्ति धेरै दर्शकमाझ पहिलो पटक खेल्दा केही नर्भस भए होलान् । तर उनीले राम्रो गर्न सक्छन् । ’ नामिबियाका दुई खेलाडीलाई स्टम्पिङ गरेका राजुले ११ बलमा ६ रन बनाएका थिए ।
