सुबास हुमागाईं, दुबई
नेपाली राष्ट्रिय टोलीका कप्तान पारस खड्का यूएईविरुद्ध सोमबार सम्पन्न ओडीआई सिरिजको ‘म्यान अफ द सिरिज’ घोषित भएका छन् । निर्णायक खेलमा नेपाललाई ४ विकेटको जित दिलाउन कप्तान पारसले शतक प्रहार गरेका थिए । यस जितसँगै नेपालले सिरिज २-१ ले जितेको छ ।
पारस खेलको म्यान अफ द म्याच पनि घोषित भए । सोमबार आईसीसी एकेडेमी मैदानमा पारसले १ सय ९ बलमा १ सय १५ रन प्रहार गर्दै नेपाललाई २ सय ५५ रनको विशाल लक्ष्यतर्फ अग्रसर गराएका थिए । उनले त्यसअघि बलिङतर्फ दुई विकेट पनि लिएका थिए ।
सिरिजको यसअघिका दुई खेलमा पनि अलराउन्ड प्रदर्शन गरेका पारस म्यान अफ द सिरिज पनि भए । पहिलो खेलमा नेपाल ३ विकेटले पराजित हुँदा पारसले २० रनको योगदान दिंदै २ विकेट हात पारेका थिए । दोस्रो खेलमा २१ रन जोडेपनि पारसले विकेट भने हात पारेका थिएनन् । उनले सन्दीप लामिछानेसँग कसिलो स्पेल गरेपछि नेपालको जितको आधार तयार भएको थियो ।
