दुबई (हाम्रो खेलकुद) – नेपाल र यूएईबीचको तीन शृंखलाको पहिलो टि–२० खेल आज हुँदै छ । खेल नेपाली समय अनुसार दिउँसो २:४५ देखी आईसीसी एकेडेमी मैदानमा सुरु हुनेछ ।

तीन ओडीआई शृंखला २–१ ले जितेको नेपाल उच्च मनोबलका साथ मैदान उत्रनेछ । नेपालले हालसम्म दुई देशसँगमात्र आइसीसी अन्तर्राष्ट्रिय टि-२० सिरीज खेलेको छ । हालसम्म श्रृंखला जित्न भने सकेको छैन । ओडीआई सिरीज गुमाएको घरेलु टोली यूएई टि-२० श्रृंखला जित्दै साख जोगाउने रणनितीका साथ मैदान प्रवेश गर्ने छ ।

नेपाल र यूएईबीच टि-२० खेलमा पछिल्लो समय सन् २०१४ को विश्वकप अघि अभ्यासका रुपमा प्रतिस्पर्धा गरेका थिए । उक्त खेलमा यूएईले नेपाललाई ६ विकेटले पराजित गरेको थियो । सन् २०१४ मा पहिलो टि-२० विश्वकप प्रतियोगितामै उत्कृष्ट प्रर्दशन गरेपछि आईसीसीले त्यसै वर्ष जुनमा नेपाललाई टि-२० अन्तर्राष्ट्रिय मान्यता दिएको थियो ।

लगत्तै नेपालले हङकङसँग ४ टि-२० सिरीज श्रीलंकामा खेल्ने मौका पाएको थियो । वर्षाले तीन खेल रद्ध हुँदा अन्तिम खेलमा नेपाल पराजित हुँदै सिरिज १-० ले गुमायो । सन् २०१५ को जुलाई जुनमा नेदरल्यान्डसँग थप ४ टि-२० सिरीज खेल्ने अवसर पायो । जुन सिरिज टि-२० विश्कप छनोट अघि अभ्यासको रुपमा पाएको थियो । उक्त सिरीज नेपालले ३-१ ले गुमायो ।

सन् २०१५ टि-२० विश्वकप छनोटमा नेपालले खराब प्रर्दशन गर्दै समुह चरणबाट बाहिरिएपछि टि-२० मान्यता गुमाएको थियो । झण्डै तीन वर्ष नेपाली क्रिकेट टोलीले कुनै पनि अन्तर्राष्ट्रिय टि-२० प्रतियोगिता खेल्न पाएन । तर नेपाली खेलाडी लगातार घरेलु फ्रेन्चाइज टि२० लिग ईपीएल, डिपिएल साथै यसै वर्ष पिपिएल खेल्दै आएका छन् । त्यसैले पनि टि-२० खेलमा उत्कृष्ट प्रर्दशन गर्ने अनुमान गरिएको छ ।

गत मार्चमा ओडीआई मान्यता पाएपछि स्वत टि–२० आई मान्यता पुन प्राप्त गर्यो । २९ जुलाई २०१८ मा नेपालले नेदरल्यान्ड र एमसिसिसँग त्रिकोणात्मक टी-२० सिरिज लर्ड्समा खेल्ने मौका पाएको थियो । वर्षाले प्रभावित हुँदा ६ ओभरमा झारिएको खेलमा नेपालले एमसिसिलाई ९ विकेटले हरायो । त्यसै दिन दोस्रो खेल नेपाल र नेदरल्यान्डबीचको खेल वर्षाको कारण पुरा हुन सकेन । नेदरल्यान्ड १६.४ ओभरमा १७४/४ को अवस्थामा निरन्तर वर्षा हुँदा खेल रद्द हुन पुग्यो । यो सिरीजसँगै नेपाल पुन आईसीसीको टि-२० वरियतामा समावेश हुने छ ।

सन्दीपमाथि बढि विश्वास

टि-२० खेलमा बलिङमा सन्दीपमाथि अझ बढि विश्वास गरिएको छ । पछिल्लो समय अन्तर्राष्ट्रिय  नाम चलेका फ्रेन्चाइज लिगमा ठूला नाम गरेका खेलाडीलाई आफ्नो शिकार बनाउँदै आएका सन्दीपले राष्ट्रिय टोलीबाट कस्तो प्रर्दशन गर्छन् भन्ने सम्पूर्ण फ्यानले व्यग्रताका साथ प्रतिक्षा गरेको छन् । नेपाललाई पहिलो ओडीआई सिरिज जिताउन सन्दीपले ७ विकेट लिदै महत्त्वपूर्ण प्रर्दशन गरे । उनले पछिल्लो समय ब्याटिङमा पनि ध्यान दिएको बताएका छन् ।

युवा खेलाडीमा निर्भर

नेपाललाई एकै पटक यूएईमा दोहोरो इतिहास रच्ने अवसर छ । तीन टि-२० श्रृंखला जित्न सके नेपालले पहिलो अन्तर्राष्टिय टि-२० सिरीज जित्दै दोहोरो इतिहास रच्ने छ । २-१ ले ओडीआई सिरीज जित्दै इतिहास रचि सकेको छ । पहिलो ओडीआई जिताउन युवा खेलाडीको प्रर्दशन महत्वपूर्ण रह्यो ।

ओडीआइ सिरीजमा सोमपाल कामी,सन्दीप लामिछाने र रोहित पौडेलले उत्कृष्ट प्रर्दशन गर्दा करण केसी, सन्दीप जोरा, आरिफ शेखले पनि राम्रो प्रभाव जमाए । टि-२० सिरिज जिताउन पनि यी खेलाडीको प्रर्दशन महत्वपूर्ण हुने छ ।

नेपाली टोली : पारस खड्का (कप्तान),अभिनाश बोहोरा,वसन्त रेग्मी,विनोद भण्डारी,दिपेन्द्रसिंह ऐरी,ज्ञानेन्द्र मल्ल,करण केसी,ललित नारायण राजवंशी, आरिफ शेख,पवन सर्राफ,प्रदिप ऐरी,रोहित कुमार पौडेल,सन्दिप लामिछाने,सोमपाल कामी,सन्दिप जोरा,भिम सार्की ।