सुबास हुमागाईं, दुबई

पछिल्लो समय नेपालमा घरेलु क्रिकेट तीन ठूला ट्वान्टी-२० फ्रेन्चाइज लिगले नै धानेको अवस्था छ । टि-२० लिगमा गरेको प्रदर्शन हेर्ने हो भने युवा खेलाडीहरुको प्रभाव अनुभवी खेलाडीभन्दा बढी छ । अहिले नेपाली टोलीमा रहेका १६ खेलाडीमा अधिकांश खेलाडी तीनै टि-२० लिगमा प्रदर्शन गरेको आधारमा टोलीमा परेका छन् ।

लामो समय घरेलु टि-२० मा अभ्यस्त खेलाडीहरु अब अन्तर्राष्ट्रिय क्षेत्रमा आफ्नो क्षमता अनुसार प्रदर्शन गर्न लालायित छन् । नेपालले ओडीआई सिरिज जित्दा पनि केहि नयाँ खेलाडीहरुको प्रदर्शनले भविष्य उज्ज्वल रहेका आशा जगाएको छ । विशेषत: मध्यक्रमका ब्याट्सम्यान रोहित पौडेल, आरिफ शेख र सन्दीप जोराको प्रदर्शनले ब्याटिङ समस्या सुल्झने सम्भावना देखाएको छ ।

यसबाहेक अवसरको पर्खाइमा रहेका युवा ब्याट्सम्यान भीम सार्की, तीव्र गतिका बलर अभिनाश बोहोरा र सुरुवाती दुई खेलमा प्रभाव जमाउन नसकेका पवन सर्राफ पनि टि-२० मा दावेदारी प्रस्तुत गर्न आतुर छन् । अनुभवी खेलाडीका रुपमा पारस खड्का, ज्ञानेन्द्र मल्ल र विनोद भण्डारीले टोलीमा आफ्नो स्थान पक्का गर्न अब मैदानमा प्रदर्शन गर्न जरुरि छ ।

टोलीमा ओपनरका रुपमा प्रदिप ऐरीलाई प्रयोग गर्ने सम्भावना प्रबल छ । ज्ञानेन्द्र मल्लले अर्को ओपनरको भूमिका निर्वाह गर्नेछन् । मध्यक्रममा प्रतिस्पर्धा झनै तीव्र बन्दै गएको छ । अनुभवी खेलाडी शरद भेषावकर नहुँदा पनि प्रतिस्पर्धा धेरै छ । तेस्रो नम्बरमा कप्तान पारस खड्का र चौथो नम्बरमा दीपेन्द्रसिंह ऐरीको स्थान लगभग पक्का देखिन्छ । टोलीको समीकरण अनुसार पाँचौ देखि सातौं नम्बरमा ब्याटिङको लागि प्रतिस्पर्धा चुलिएको छ ।

सन्दीप जोराले सोमबार भएको निर्णायक ओडीआईमा देखाएको खेलशैलीले उनलाई पाँचौ नम्बरमा बलियो दावेदारी प्रस्तुत गर्न सहयोग पुगेको छ । घरेलु टि-२० मा पनि उनले पछिल्लो समय प्रभाव जमाउँदै आएका छन् । यसबाहेक विनोद भण्डारी, भीम सार्की, आरिफ शेख र रोहितकुमार पौडेल त्यसपछि ब्याटिङ स्थानको लागि टोलीमा पर्न संघर्ष गरिरहेका छन् ।

विनोदले आक्रामक ब्याटिङका रुपमा घरेलु तथा अन्तर्राष्ट्रिय प्रतियोगितामा आफ्नो प्रभाव देखाएका छन् । ओडीआई सिरिजमा ओपनरको रुपमा आएका उनले धैर्यतापूर्वक ब्याटिङ गर्ने क्षमता पनि देखाएका छन् । आरिफ शेखले मध्यक्रममा एकरुपता दिंदै पटक पटक नेपालको मध्यक्रम सम्हालेका छन् । यता रोहित पौडेलले पनि अर्धशतकसँगै आफ्नो क्षमता प्रस्तुत गरिसकेका छन् । भीम सार्कीले पछिल्लो एक वर्ष घरेलु क्रिकेटमा देखाएको प्रदर्शनले उनलाई पनि विकल्पको रुपमा हेर्न सकिन्छ । पवन सर्राफ पनि स्पिन अलराउण्डरका रुपमा सातौं नम्बरको लागि दावेदारी प्रस्तुत गरिरहेका छन् ।

तीव्र गतिका बलरद्वय सोमपाल कामी र करण केसी आफ्नो बलिङसँगै ब्याटिङ गर्नसक्ने क्षमताका कारण पनि प्रभावशाली देखिन्छन् । अभिनाश बोहोराले घरेलु टि-२० मा विदेशी खेलाडीहरु समेतलाई दबाबमा राखेको हुनाले उनले पनि अवसर पाउन सक्नेछन् । स्पिन बलिङमा सन्दीप लामिछानेसँगै ललित नारायण राजवंशी र वसन्त रेग्मीमा एक खेलाडीले स्थान बनाउने छन् । वसन्त ओडीआई सिरिजमा बिरामी परेका कारण विश्राममा रहे । ललितको तुलनामा उनको ब्याटिङ पनि राम्रो रहेकाले फिट भएको खण्डमा उनले स्थान बनाउने छन् ।

सम्भावित सुरुवाती ११ :

ज्ञानेन्द्र मल्ल, प्रदिप ऐरी, पारस खड्का (कप्तान), दिपेन्द्रसिंह ऐरी, सन्दीप जोरा, विनोद भण्डारी, पवन सर्राफ, सोमपाल कामी, करण केसी, सन्दीप लामिछाने, वसन्त रेग्मी