दुबई (हाम्रो खेलकुद) – यूएईविरुद्धको तीन टि–२० श्रृंखलाको दोस्रो खेलमा नेपाल ४ विकेटले विजयी भएको छ । १ सय ८ रनको लक्ष्य पक्ष्याएको नेपालले ६ विकेट गुमाउँदै ३ बल बाँकी रहँदा पुरा गर्यो । यस जितसंगै ३ खेलको श्रृंखला १–१ को बराबरीको स्थितिमा पुगेको छ ।

आईतबार निर्णायक तथा तेस्रो खेल हुने छ । विजेता टिमले सिरीज पनि जित्ने छ । नेपाल पहिलो खेलमा २१ रनले पराजित भएको थियो । नेपालको जितमा उत्कृष्ट प्रर्दशन गर्ने यी ३ खेलाडी :

दिपेन्द्रसिंह ऐरी

शीर्षक्रमका ब्याट्सम्यान कप्तान पारस खड्का, ज्ञानेन्द्र मल्ल, प्रदीप ऐरी, सन्दीप जोरा र करण केसी सस्तैमा आउट हुँदा कुनै समय सामान्य लक्ष्यमा पनि नेपालको जित कठिन बनेको थियो । नेपाल ११ ओभरमा ४६–५ को कमजोर अवस्थामा थियो । तर पनि क्रिजमा दिपेन्द्रसिंह ऐरी थिए । सबैले दिपेन्द्रमाथिनै जितको विश्वास राखेका थिए ।

दिपेन्द्रले छैटौं विकेटका लागि डेब्यू ब्वाई पवन सरार्फसँग ५५ रनको कीर्तिमानी साझेदारी गर्दै नेपाललाई १०१/५ को अवस्थाा पुर्याए । नेपाललाई अन्तिम ६ बलमा ७ रन आवस्यक थियो । पहिलो बलमै पवन सरार्फ १८ रनमा क्याच आउट हुन पुग्दा दोस्रो बलमा दिपेन्द्रले स्ट्राइक पाए । ऐरीले दोस्रो बलमा जहुर खानलाई सिधा बाउन्ड्रीमा कडा छक्का प्रहार गर्दै खेल बराबरीमा पुर्याए ।

तेस्रो बलमा चौका थर्ड म्यानतर्फ प्रहार गरेपछि नेपाल ४ विकेटले विजयी भयो । सम्रगमा ऐरीले ४१ बलमा ४ चौका र १ छक्का प्रहार गर्दै ४७ रनमा नट आउट रहे । दिपेन्द्रनै आजको खेलमा म्यान अफ द म्याच पनि चुनिए । यस अघि ओडीआई सिरीज र पहिलो टि– २० क्रिकेटमा राम्रो प्रर्दशन गर्न नसक्दा आलोचना भई रहेका दिपेन्द्रले आलोचकलाई पनि यसै खेलबाट राम्रो जवाफ दिएका छन् । नेपालको जितमा दिपेन्द्रको प्रर्दशन महत्वपूर्ण रह्यो ।

अभिनास बोहोरा

यूएईलाई सस्तैमा समेट्न तीव्र गतिका युवा बलर अभिनास बोहोराले उत्कृष्ट बलिङ गरे । आफ्नो पहिलो स्पेल लिएर नवौं ओभरमा आएका अभिनासले ४ रन मात्र खर्चेका थिए । उनले त्यसपछि १३ ओभरको चौथो बलमा आमिर हायतलाई ३ रनमा आउट गरे । १५ औं ओभरको तेस्रो बलमा कप्तान मोहम्मद नाविदलाई पनि अभिनासले ज्ञानेन्द्र मल्लबाट क्याच गराउँदै ७ रनमा पेभिलिएनको बाटो देखाए ।

एक तर्फबाट यूएईको विकेट पतन निरन्तर जारी हुँदा अर्को एण्डबाट सि.पि. रिजवानले रन जोडी रहेका थिए । रिजवान अन्तिम ओभर सम्म टिक्नु नेपालको लागि घातक सावित हुन सक्थ्यो । तर अभिनासले १९ औं ओभरको दोस्रो बलमा कप्तान पारस खड्काबाट क्याच गराउदै ४४ रनमा आउट गरेपछि यूएई सस्तैमा समेटियो । उत्कृष्ट प्रर्दशन गर्दै ४ ओभरमा २० रन खर्चेर ३ विकेट लिएका बोहोरा नेपालको जितमा नायक बने । यो बोहोराको दोस्रो अन्तर्राष्ट्रिय टि–२० खेल हो ।

सोमपाल कामी

यूएईलाई दवावमा राख्न सोमपालले सुरुवाती दुई झड्का दिएका थिए । उनले पहिलो ओभरको अन्तिम बलमा अस्फाक अहमदलाई ४ रनमा आउट गरे । त्यस्तै यूएईका अर्का भरपर्दा विकेटकीपर समेत रहेका गुलाम शब्बेरलाई तेस्रो ओभरको तेस्रो बलमा ६ रनमा आउट गर्दा यूएई दवावमा पर्यो । जसको फाइदा मिडिल अडरमा सन्दीप र करण केसीले उठाएका थिए ।

सोमपालले पाँचौ ओभरमा ८ रन खर्चे । लगातार चौथो ओभर बलिङ गर्ने क्रममा उनले आठौं ओभरमा २ रन खर्चिदै आफ्नो बलिङको कोटा सकाए । सोमपालले ४ ओभरमा मात्र १५ रन खर्चेर २ महत्वपूर्ण विकेट लिदै घातक बलिङ गरे । सोमपालले गरेको २४ बल मध्य १५ डट थियो ।